Ki nongrep synsar ki ioh ia ka MSP, ong u Myntri
Shillong, Jymmang 21 : Ka Sorkar Jylla kala thung ia ka High Level Committee bad ki District Committee bala khlieh da ki Deputy Commissioner kum ki Chairman ba kin lum jingkhein ia ka jingduhnong jong ki nongrep kwai namar ka jingbam khniang ki diengkwai, ban ithuh ia ki jaka kiba shah ktah jur eh bad ban ai jingmut ia ki sienjam ban ratdyngkhong ia ka jingpyut ki shylliut.
Ia kane la pyntip da u Myntri kam rep Timothi D Shira uba la pyntip ba kane ka jingkem pyut ki shylliut diengkwai bad jingbam khniang u diengkwai kala ktah ia bun tylli ki district ka Jylla.
“Ym baroh ki jaka ha man ki district kiba shah ktah, hynrei ka jingktah ka long eh tang haki jaka ba rep kwai” ula ong.
Ula pyntip ‘Wat ha North Garo Hills, South GaroHills, West Garo Hils, South West Garo Hills, katto katne ki jaka ha Ri-Bhoi, East Khasi Hills bad ki jaka them ha khappud ka Bangladesh bad South West Khasi Hills, la pyntip ia ki jinglynshop u khniang diengkwai bad jingpyut ki shylliut”.
Halor ki nongrep synsar, u Myntri ula pyntip ba ka Sorkar Jylla kala dep buh ia ka Minimum Support Price ia u synsar khnang ba ki nongrep kin ym duhnong haba hiar ka dor. U pyntip ba haduh mynta, kam pat don satia kano kano ka jingud jingnam halor kane.
Halor ka project ropeway, u Timothi uba bat ruh ia ka tnad Jngohkai u pyntip “Ka shillong Ropeway project ka dang iaid mynta hynrei ngam pat ju leit peit ia ka jaka. Ia ka project la aiti ban pyntreikam hashuwa ba ngan shimti ma nga bad ngam pat ioh khubor eiei halor jong ka. Kumta, nga tharai ba kiei kiei kila iaid beit iaid ryntih”.
