Shillong, Naitung 20: U Myntri ka Tnad kam Pohiing ka Jylla ma Lahkmen Rymbui hynne ka sngi balang,ula kular ba ka Sorkar Jylla kan pynthikna ba ka jingiakren iasuk bad ka kynhun kiengatiar Hynniewtrep National Liberation Council (HNLC) kan poi haduh kaba kut bad ba iahunlang.
“Ngi khlem buhpor satia hynrei kumba nga ong, ka jingiaphylliew jingmut ka long kaba donkam ban pynbeit ia ki ishu bad nga kyrmen ban lah pyndep kham kloi kat kaba lah. Ngan ym jubab la ki don hangne ne shatai hynrei nga ong ba ka jing iakren ka dei ban sdang ban poi sha kaba iahunlang” ong u Ma Lahkmen haba iakren bad ki nongthoh khubor.
Kane kala mih tang shiteng hadien ba u Nongmihkhmat ka HNLC bad President ka seng HNYF Bah Sadon K Blah ula pyntip ia ka rai jong ka Sorkar Pdeng bad Sorkar Jylla ban ai ia ka lynti iaid kaba shngain ia ki Nongialam ka HNLC ba kin wan sha ka miej iakren iasuk.
Haba pynpaw ba kam dei satia ka jingkylli ia ka jingai lynti iaid ne kano kano, u Ma Lahkmen ula ong “Ngin (Sorkar) leh ia kaei kaba dei ban leh ban pynthikna ba ka jingiakren kan urlong ha ka lynti kaba jai jai bad kaba iashaniah mar kylliang”.
U Myntri kam pohiing ula ong ba ka jingiakren iasuk kala sdang bad ka Sorkar Jylla ka ngeit skhem ba lyngba ka jingiakren ha ka miej iakren kan lah ban pynbeit ia baroh ki kam ki jam.
“Kumba phi tip, ka HNLC kala mynjur ban iakren khlem buh kyndon bad ka Sorkar bad kala thung ia u Bah Sadon K Blah kum u Nongmihkhmat bad ka Sorkar kala thung ia u Bah PS Dkhar, Ophisar IAS bala shongthait kum u Nongmihkhmat jong ngi khnang ba ka jingiakren kan sdang bad poi sha ka jingiahun lang” ong u ma Lahkmen.
