Shillong, Naitung 07: U nongialam ka BJP bad MLA ka Pynthorumkhrah Bah AL Hek hu la pynpaw ia ka jingsngewskhem ba ka BJP kan thaw ia ka Sorkar ha Meghalaya ha u snem 2028, bad u la kyntait ia ka jinglah ban don kano kano ka jingiateh lok bad kiwei ki sengsain pyrthei hashwa ka elekshon MLA 2028.
“Ngeit ia nga, ha u snem 2028 kan dei ka Sorkar ba ialam da ka BJP ha Meghalaya, kata ka long kaba shai bha, ki nongialam BJP na Delhi kin sa rai mano ban long nongialam, hynrei ngan ong biang ba ha u snem 2028 kan dei ka Sorkar ba ialam da ka BJP ha Meghalaya” ong u bah Hek.
Halor ka jingkylli la ka party kan pyrkhat ne em ban iateh lok bad kiwei ki sengsain pyrthei, u Bah Hek la ong ba ka BJP ka thmu ban iakhun marwei ia ka elekshon MLA”.
“Ngin iakhun marwei. Yn nym don kano kano ka jingiateh lok hashwa ka ilekshon MLA bad kino kino ki seng sain pyrthei” u la pynskhem.
Haba kylli halor ka jingkynnoh ba kan don ka jingkylla nongialam ka Meghalaya BJP hashwa ka elekshon MLA 2028, u Bah Hek u la ong ba kane ka kam ka don hapoh ka jingpeit jong ki nongialam ka BJP na Delhi.
“Kata kan shong ha ka rai jong ki nongïalam ka BJP na Delhi. Ngan ym lah ban kren eiei halor kano kano ka rai ba la shim ha ka kyrdan jong ka Party ha Delhi” u la ong.
