Shillong, Naiwieng 13 : Ka Sorkar Jylla kan ym pynduh ne pynkynriah ia ka Shillong Peak Ropeway Project halor ki jingtieng ki bym don nongrim, ong u Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Palei, haba pynpaw ba u iai plie beit ia ka jingkhang ban iakren biang bad ki nongiakhih.
Haba kylli halor ka Joint Action Committee (JAC) kaba pyrshah ia ka project, kaba pynlong ia ka jing iakhih hakhmat ka Secretariat bad la ka Sorkar kan khot iakren ia ki, u Bah Prestone ula ong ba ka Sorkar kam ju khang ia ka jingkhang.
“Ka jingkhang ka plie beit. Na ka liang jong ngi, naduh ka sngi ba nyngkong, ngi la pynlong ia ki jing ialang ym duna ia ka 3-4 sien” ula ong ‘Watla katta, ka jingkhang ka dang plie. Lada ki kwah ban wan iakren biang, ngi don hangne”.
Hynrei ula pruid da u dak ia ka rukom pynlong jingiakhih.
“Ka shong ha ki. Lada ki kwah ban iakren shuh shuh, ka jingkhang ka plie bad ngi long kiba kloi ban iakynduh ia ki, hynrei ym da kane ka lynti. Phim lah ban shu ong, ia ngin ialeit tur sha Secretariat” ong u Bah Prestong.
U ong ba ka Sorkar ka kwah ia baroh ban iadonlang.
“Nga kwah ban kyrpad ia baroh, ka Sorkar ka kloi beit ban iakynduh. Lada phi kwah iakren, ngi long kiba kloi ban iakren halor kino kino ki kam namar ngi kwah ba baroh kin iamynjur lang” ula ong.
“La ka dei ka project kaba heh ne kaba rit, khatduh hi ka dei na ka bynta ka jingmyntoi ki paidbah ka Jylla. Kam dei na ka bynta ka jingmyntoi u Bah Prestone, lane Conrad lane Bah Sniawbhalang, ka dei na ka bynta ka jingmyntoi jong baroh kiba don hangne ha Meghalaya” ula bynrap.
Halor ka jingdawa ka JAC ban pynduh ne pynkynriah ia ka project, u Bah Prestone ula kren shai “Em, halor kano ka nongrim?. Kaei ka jingkam jong ki?”.
U ong ba ka jingsngewkhia ka JAC ka iadei bad ka jinglah ban julor ki tyllong um, pom ia ki dieng bad ka jingma ia ka mariang.
“Kane ka long ka dei kaba la wanrah la slem bha bad lah pynlong ruh ia ka jingbishar kaba bniah. Ngi la thung ia ki stad ki jhad ha baroh ki bynta jong ka kam. Ki dalade kila leit ban iohi ia baroh kiei kiei ha katei ka jaka bad khatduh kila aiti ia ka kaiphod sha ngi” ula ong.
“Hadien ba ngi la pynbiang lut ia baroh ki jingdonkam, ngi la ioh ia baroh ki NOC bad sa sdang ia baroh ki kam” ong u Bah Prestone.
Haba kylli la kane ka jingiakhih ka dei kaba don ka jingleh politics na lyndet, u Bah Prestone ula kyntait ban pyniasoh ia ka bad ong “Ngan ym ong eiei halor kata. La ka dei ka kam sain pyrthei ne kam dei, ka mat, ka jingsngewkhia ba ki don, Nga iaroh ia ki” ula ong.
“Kum ki nongshongshnong ka Jylla, phi don ia ka hok ban pynsngew ia kine ki jingsngewkhia. Ngi pdiang ia ki. Hynrei haba kut, kaei ka jingshisha?” buh jingkylli u Bah Prestone.
Ula ong ba ka Sorkar kala dep ai ia ki jingbatai kiba bniah halor ka project.
U Bah Prestone ula kyntait ia ka jingkam ba ki tyllong um kin tyrkhong noh.
“Lada phi dang ong, lada mih kane ka project, ki tyllong um kin tyrkhong noh, Nga tharai kane ka long kaba bakla. Phi hap ban sngewthuh kawei, ka ropeway project ka dei ka project ka bym ktah ia ka mariang” ula ong.
“Phi leit sha ka Sorkar India, leit sha kano kano ka Sorkar Jylla, phin sa ioh lut ia kine. Ka project kaba biang tam ia mynta ha ka ri baroh kawei ka dei ka ropeway, namar ka iahap bad ka jinglong jingman ka mariang hangne” ula bynrap.
