Shillong, Naitung 20: U Myntri ka Tnad Pule Puthi ka Jylla ma Lahkmen Rymbui hynne ka sngi balang, ula kyntait ia ka kaiphod ba dang shen ba pynhiar kyrdan shatrai duh ia ka pule puthi ha Jylla Meghalaya hapoh ka Performance, Infrastructure and Equiry (PIE) Index, 2020-2021 jong ki skul Primary bad Secondary.
Ia kane ka jingai kyrsan la pynmih ha ka kot “The PIE Index 2020-2021: Measuring the Health of Primary and Secondary Education System in India” bala pynmih da ka Observer Research Foundation dang shen.
“Ia kane ka kaiphod la pynkhreh da ka agency shimet ym da ka Ministry of Education. Ka Ministry of Education kala ai kyrdan dakaba pynshong nongrim kat kum ka Performance Grading Index (PGI)” ong u ma Lahkmen haba iakren bad ki nongthoh khubor.
U Myntri ula ong ba kaei kaba la thoh ha kane ka kaiphod kam dei satia kaba shisha haba pynpaw “Ha ka por ba ngi shimti ma ngi ia ka Sorkar, ngi sngewthuh ba ngi hap ban pynjanai ia ka pule ka dangle ha Jylla, ki lai tylli ki paia ki kynthup ia ka-Quality Education (jingai jinghikai kaba janai), ka jingai jinghikai pyntbit ia ki Nonghikai bad ka jingpynbiang ia ki jingtei ki dei kiba kongsan”.
“Kumba phi tip, ki jingtei jong ki skul Primary ha baroh kawei ka Jylla ki dei kiba la isangsot. Kumno phi khmih lynti b aka Sorkar kan pyniaid da ka jinghikai online ne digital classroom haba ki iingskul kim don tnum, kim don jingkhang” ula ong.
Namar kane, u ma Lahkmen ula pyntip ba ka Sorkar Jylla ha kine ki 2-3 snem kala rai ban theh bun bah ka pisa sha ki jingtei ia ki Iingskul ka Sorkar ban lah pynbha pat ia ki.
Kat kum ka jingong jong u, u Myntri Rangbah ka Jylla ula dep ban pynbna ban pynbha noh ia ki jingtei jong palat 1800 tylli ki Iingskul ha ka Jylla.
