Shillong, Naitung 20 : Ki nonghikai SSA ba dang iakhih mynta, kila byrngem ban ia iehnoh kam paidbah (mass resignation) lada u Myntri ka tnad pule puthi ma Lahkmen Rymbui um pan map halor ka jingkren pyrshah ia ka jingiakhih ki nonghikai.
Ki nonghikai hapoh ka lama jong ka Meghalaya SSA School Teachers Association (MSSASA) kila shim khia ia ka jingkren u ma Lahkmen Rymbui ba byrngem ba ka sorkar kan leh tyngeh ba lah ban poi sha u pud ka jingpyntreikam ia ka hukum “no work-no pay” bad pynduh ia ka grant jong ki School Managing Committee lada ki nonghikai kim leit phai noh sha kk skul bad shim klas ia ki khynnah.
Palat 6000 ngut ki nonghikai SSA napdeng kj 12,541 ngut kila iathia ha surok mynta lah lai sngi kum shibynta na ka jingiakhih da kaba shong mungor ban pyrshah ia ka jingbym lah ka sorkar ban pyllait ia ka tulop jong ki kaba lah sahteng haduh 5 bnai.
Haba iakren bad ki nongthoh khubor, u President ka MSSASA bah Aristotle Rymbai ula ong “Ngi kwah ban phah ia ka khubor ka ba shai sha u Ma Lahkmen ba u dei ban panmap hapoh lashai ka sngi lem kumta kan pynbor ia ngi ban ia iehnoh kam paidbah”.
U bah Aristotle ula ong ba ki nonghikai ki khlem mih sha surok ban lehkmen hynrei la pynbor ia ki ban thiah ha surok mynta la lai sngi namar ka jing leh mutlop jong ka sorkar halor ka jingdawa ban pyllait noh ia ka tulop ba pynsahteng lah san bnai.
“Sngewbha wat pynbor ia ngi ba ngin ia iehnoh kam paidbah namar lada baroh 12,541ngut ki nonghikai ki iehnohkam, ka pule puthi ha ka kyrdan elementary khlem pep kan sa khyllem” ula ong.
