Shillong, Naitung 07 : Ka Meghalaya High Court ha ka sngi Ba-ar kala ailad ia u MLA ka VPP na North Shillong Bah Adelbert Nongrim ban weng noh ia ka PIL ba tynjuh pyrshah ia ka State Reservation Policy na ka bynta ki Central Quota seat ha ka higher education, hadien ba la pyntip sha IIngkasahri ba ka mudui kam shym la iaid kat kum ka PIL Rules ba donkam ban bud.
Ka Division Bench ba kynthup ia ka Chief Justice Revati Mohite Dere bad Justice W Diengdoh kala pynwai noh ia ka PIL kum kaba la weng noh, haba ai lad ia u nongmudui la un ai da ka jingthoh sha ki bor ba dei khmih lane file ia ka mudui ba thymmai kaba iaid kat kum ka rule.
Haba sdang jong ka jingbishar, u Advocate General A Kumar ula pyntip ba ka “PIL bala mudui da u nongujor kam dei kaba iaid kat kum ka PIL Rules, kaba long kongsan ban bud”.
Namar kane, u nongiasaid ain jong u nongmudui P Yobin ula pan jingmut ban weng noh ia kane ka kam.
“Ngi pan jingbit ban weng noh ia ka mudui da ka jinglaitluid ban phah da ka jingthoh sha ki bor ba dei khmih, kat kaba I donkam, lane ban mudui da ka ujor ba thymmai kaba long thik kat kum ka PIL Rules” ong u nongiasaid.
Ka Iingkashari kala pdiang ia kane ka jingkyrpad bad kala pynwai noh ia kane ka PIL.
U Bah Adelbert ula mudui ia ka PIL ba buh jingkylli ba kumno ka Sorkar Jylla ka sam ia ka bhah pule jong ka Central Pool na ka bynta ki jingpule MBBS, Engineering bad Agriculture.
Kat kum ka ujor, ka Jylla ka khot aplikeshon ia kine ki seat pule bad sam ia ki da kaba pyntreikam ia ka Meghalaya Job Reservation Policy.
U Bah Adelbert ula pynksan ba ka jingpyndonkam ia ka Job Reservation Policy na ka bynta ka jingpule khlem ki ain kiba kyrpang ka long kaba beriti.
