Shillong, Naitung 7: Ka Meghalaya State Skill Development Society (MSSDS) ha ka sngi Baar, kala pyntip ba kala dep ban tohkit mardor ban pynshisha halor ki jingkynnoh jong ki nongioh jinghikai (Trainees) hapoh ka On-the-Job Training (OJT) ha Pune bala bei tyngka da ka sorkar lyngba ka Skill Development Programme bad kam shim la lap satia ia kano kano ka jingshisha halor katei ka jingkam.
Da kaba shimkhia ia ka jingsaphriang ki khubor ha ki rynsan social media bad ki lad pathai khubor, ka MSSDS kala ong, ba ka jingshngain bad ka bha ka miat jong ki samla kiba ioh jinghikai kadei kaba ka sorkar kala buh hakhmat eh.
“Ka Sorkar Meghalaya ka buh nyngkong bad hakhmat eh ia ka jingshngain, burom bad ia ka bha ka miat ia baroh kiba leit ban ioh jinghikai pyntbit. Ia man la ki jingsngewkhia kadei kaba la shimkhia mardor hi, kaba lah da khmih bniah thikna bad shimkhia da ka jingiaid ia ki kyndon kiba la buh” ong ka MSSDS.
Katkum ka jingong ka Society, kala bthah ia kaba ai Training bad Placement Provider (TPP) ha ka 1 tarik u Naitung 2026 ban iakren bad baroh kiba ioh jinghikai bad ban tyrwa ba kin wanphai noh mardor sha ka jylla ha ka jingpynlut pynsep jong ka sorkar.
Kila don arngut kiba leit ioh jinghikai kynthup ia kaba ujor, kila jied ban wanphai noh bad la pynkhreh bad pynbit pynbiang ia ki jingdonkam ki jongki khlem kano kano ka jingpynslem. La pyntip ruh ia kiwei pat kiba ioh jinghikai kiba dang sah ba ki lah ban wanphai noh hynrei kila jied ba kin iai bteng ban sah ban pyndep ia ka OJT bad Placement.
Ka MSSDS kala ong, ba kala leh ia katei ka jingpynshisha lyngba kiba bun ki lad, da kaba iakren bad ki pulit ha katei ka thain, ki nongmihkhmat jongka National Volunteers Meghalaya, ka NGO kaba treikam ha katei ka nongbah bad la leh ruh ia kawei ka Video Conference da ka MSSDS.
“Lyngba kitei ki jingwad bniah, kam shim la don kano kano ka jinglap ne ka jingphla ban pynshisha ia ki jingkynnoh pyrshah ia ki nongaikam ne ka TPP kaba la ioh ia ka jingithuh” kala ong.
Ki nongioh jinghikai ne Trainee kiba la rai ban sah, kila pynpaw ha ka MSSDS ba ki sngewshngain bad ki sngewjuh bad ka jinglong jingman ha kaba iadei bad ka jingioh jinghikai.
Kila pynpaw ruh ia ka jingsngewkhia ba kila don ki jingkynnoh ki bym don satia ia ki jingshisha kaba lah ban ktah mationg ia kane ka kynhun ki nongleit ioh jinghikai pyntbit bad ban pynduh mynsiem ia ki nongaikam ban shim ia ki samla na ka jylla Meghalaya.
Ka MSSDS kala pynpaw ba kaba ujor kham hashwa kala ioh ia ka jingiasyllok ha ka jaka trei bad halor ka rukom treikam bad ki kyndon treikam.
Kaba ujor kala pynrung kyrteng ha ka Senior Beauty & Spa Therapist Course hadien ba kala pdiang ia ka shithi jingtyrwa halor ka rukom trei ia ka kam bad ia ki kyndon treikam.
Kane ka prorkam kadei kaba la bei tyngka pura da ka sorkar bad ka kynthup ia ka jingioh jinghikai, ka leit ka wan, jaka sah bad ka jingioh ia ka stipend kaba manla u bnai kaba T.4,000 ha ka por ba leh ia ka OJT.
La pyntip ba ia baroh ki rekod la dep ban aiti sha ki bor kiba dei khmih ban pynlong ia ka jingkhmih bniah da ka kynhun kaba laitluid bad ka MSSDS kala ong ba kala bud ryntih ia ki kam ki jam ha kaba iadei bad ka rukom thungkam ha kaba ki TPP kiba la ioh jingithuh kila pyndep ia ki kam ki jam ha kaban khmih ia ki nongaikam.
Ki samla ki hap ruh ban leit ia ka jingiasyllok bad ka jingai jinghikai ha man la ki wat ban pynthikna ba ki sngewthuh ia ka kam kaba ki trei, ka jingsiew bad ka jingkhmih lynti ha ka rukom treikam ka jongki.
“Ka Beauty & Wellness Sector kadei ka kam trei kaba la ioh ia ka jingithuh kum ka karkhana kaba tyrwa ia ka jingtbit, don burom bad kaba biang ka jingsiew bad kiba bun ki kabu na ka bynta ban kiew shaphrang ha ki por ban wan” la ong ka Society bad ka bynrap ba ki jingkynnoh ki bym don ka jingshisha ki lah ban ktah jur ia ki Skill Development Programme bad ki kabu ia ki samla ban ioh ia ki lad ban iohkam.
Ka MSSDS kala ong ba kane ka mat kadei kaba dang don hapoh jong ka jingkhmih bniah.
“Lada ka don kano kano ka jingpynkhein da kiba donbynta lang ha ka kam hadien ba la dep ban pynshisha, ka sorkar kan shim da ki sienjam kiba tyngeh hapoh jong ki kyndon aiñ bad kiba lah ban pyntreikam katkum ka Contractual Framework,” kala ong.
Da kaba iengskhem ha ki jingkular, ka Sorkar kala ong “Ba kan iengskhem ha kaban pynleit jingmut ha ka jingleit kaba shngain, ka jingthungkam kaba shisha bad thikna bad ha ka rukom long kaba khuid ba suba, kaban long na ka bynta ka bha ka miat jong ki samla ka Jylla”
 ha ka sngi Baar, kala pyntip ba kala dep ban tohkit mardor ban pynshisha halor ki jingkynnoh jong ki nongioh jinghikai (Trainees) hapoh ka On-the-Job Training (OJT) ha Pune bala bei tyngka da ka sorkar lyngba ka Skill Development Programme bad kam shim la lap satia ia kano kano ka jingshisha halor katei ka jingkam.){kind=link}