Sub- Dawa tohkit ia ka Sorkar bad weng ia u Bah Vivek Syiem kum u SP ka EKH
Shillong, Nailur 30 : Ka Khasi Students’ Union (KSU), kala kyndang bad sei pyrthei ia ki kam dawa pisa be-ain bala kynnoh donkti da ki Pulit ka Jylla ha ka surok National Highway ha Mawkhanu bad Thangshalai kaba hap hapoh ka Mawryngkneng Police Station.
Ia kane ka jingkyndang kam beain ki pulit la ialam da u Education Secretary ka KSU-CEC samla Alerick Kharjana, kaba la leit jurip ban ioh kem ia kane ka kam be-ain hadien ka jingioh pdiang ia ki jingujor na kiba bun ki briew.
Ki dkhot ka KSU kila ring dur khih (video) ban pynshisha ia kane ka kam beain jong ki Pulit-kiba pyni ruh ia ki pulit katba ki dang shim pisa na ki trok kiba kit tiar, kit marpoh khyndew, kit marbam. La kynnoh ba ki Pulit kila khrong hapdeng T.200 haduh T.500 na kawei ka trok.
Ka KSU ka suba jur ba ka jingnud ki Pulit ban leh ia kane ka kam beain lehse ka lah ban don ka jingiapynbeit da ki Heh Pulit. “Kumno kine ki Pulit barit baria kin nud ban lum pisa bad miet bad sngi na ki nongniah trok khlem da don ka jingiapynbeit bad donkti ki heh Pulit” kala buh jingkylli.
Ka KSU ka buh jingkylli ia ki bor pyniaid district ka East Khasi Hills ba mano ba aibor ia kine ki Pulit ba kin lum pisa na ki trok. “Hato dei u SP Bah Vivek Syiem lane u DC Abhilash Baranwal, IAS lane baroh arngut bad lehse ki Myntri Sorkar ruh ki don bynta lang halor kane ka kam?” kala kynnoh.
Haba dawa ia ka Sorkar ban pynlong ia ka jingtohkit ba laitluid halor kane ka kam khnang ban rat dyngkhong ia kine ki kam beain da ki riew bat ain, ka KSU kala ong “Ka Seng kan sa leit buh ia ka jingujor hakhmat ki bor pyniaid ha kine ki khyndiat sngi ban wan”.
“Kum kine ki jingjia ka pyni ïa ka jingbamsap kaba jur hapoh ka tnad pulit bad ka KSU kan rad dynkhong ïa kum kine ki kam bamsap kiba pyntlor ïa ka jylla ha ka roi ka par ha kaba ki mar bam mar dih ki kiew dor man la ka por” kala ong.
Ka Seng ka dawa ba dei ban weng mardor ïa u SP ka East Khasi Hills District u Vivek Syiem uba la ailad ïa kum kane ka kam ban jia hapoh ka jingpeit ka jong u bad kumjuh ruh ïa u DC. Dei ban don ka jingtohkit kaba bniah halor kane ka kam.
Ka Seng kan dang iai pynjur ban pynlong ia kum kine ki talasi wat lada dei ki pulit ne ki briew jong ka aiñ kiba leh donbor.
