Shillong, Nailur 30: Ka Garo Hills Autonomous District Council (GHADC) kala pynthymmai ia ka Electoral Rules da ka jingai jingmynjur u Lat ka Jylla ia ka Second Amendment jong ka District Council Constitution Rules, 2026.
Ha ka jingpynbna paitbah ne Notification jongka District Council Affairs Department bad kaba la pynmih ruh ha ka Meghalaya Extraordinary Gazette No. 195 ha ka 30 tarik u Nailur, kadei kaba la mynjur da ka GHADC ha ka 7 tarik u Nailar bad kaba la mynjur da u Lat ha ka 28 tarik u Nailur.
Ki don artylli ki jingpynkylla kiba kongsan kiba la dep ban Notify hapoh jongka Rule 128 bad 129 jongka Assam and Meghalaya Autonomous Districts (Constitution of District Councils) Rules, 1951.
Kaba nyngkong, ka rta ban pynrung kyrteng kum ki nongthep vote bad ban iakhun ia ka elekshon GHADC la pynhiar noh na ka 21 snem ka rta sha ka 18 snem ka rta. Ka kyntien “Ym duna ia ka rta kaba 21 snem” mynta la pynmih bujli noh da ka ong, “Ym duna ia ka 18 snem ka rta ha ka Qualifying Date”.
Ka Baar, ha katei ka Amendment la pynrung ruh, ba ki kyrtong kidei ban long ki dkhot jong ka jaidbynriew riewlum ne Scheduled Tribe kumba la kdew ha ka Constitution (Scheduled Tribes) Order, 1950, ha kaba iadei bad ka jylla Meghalaya. Ia ka kyndon kaba la don lypa hapoh ka Rule 128 lah weng noh.
Hapoh jong katei ka jingpynkylla thymmai ia ka Rule 129, kan don ruh la ka jong ka thup kyrteng kaba kyrpang ne Separate Electoral Roll ia man la ki constituency hapoh jong ka GHADC, kaban pynkhreh da ki Returning Officer katkum ki kyndon kiba la buh hapoh jong ka Rule 128.
Kine ki kyndon aiñ kiba thymmai kin treikam noh mardor bad kin treikam ha ka Garo Hills Autonomous District baroh kawei, la ong ha Gazette Notification.
