Guwahati, Risaw 01: U Myntri Rangbah ka Jylla Assam, u Himanta Biswa Sarma, ula pan map na uwei u nongpang bad kiba haïing jong ki, hadien ba la ïathuh ba kawei ka kali kit nongpang, ka la sahkut ha Silchar, ban plie lad ïa ka kali jong u.
Ha ka jingthoh jong u ha ka X, u Sarma u la ong ba ka jingpynsangeh ïa ka kali kit nongpang ka long kaba “bym lah ban pdiang” bad u la panmap na u nongpang bad na ka longïing.
“Ym don Myntri Rangbah ki ban lah ban khim khia ïa ka jingim kaba donkam ïa ka jingsumar kyrkieh,” u la ong.
U Sarma u la ong ba u la bthah bunsien ia ki heh ophisar ban pynthikna ba ka jingleit jingwan jong ki VIP kan ym pynthut ia ki nongshong shnong, bad u la pynpaw ia ka jingsngewkhia ba ym shym la bud ia ki jingbthah.
U la bthah ia ki bor ba dei peit ban leh da kaba tyngeh ia kiba donkti bad bthah ruh ban tohkit halor kane ka jingjia.
“To ai ba kane kan long ka jingmaham kaba shai kdar: ïa ki jingbthah halor ka kynhun jong u CM yn pyntreikam da kaba shai.Uno uno uba lap ba pynkheiñ ïa ka un mad ïa ki jingpynshitom kiba tyngeh,” ong u Sarma.
Ha kajuh ka por, saw ngut ki pulit kiba donkti ha katei ka jingjia la sospon noh mardor katba dang ap ia ka jingtohkit jong ka tnad.
Katkum ka hukum, la bthah shai ia baroh ki briew ban iada na ka jingpynthut paidbah ha ka por ba iaid ki kali convoy.La maham ruh ia kiwei pat ki SP bad ki Dy SP ban pynthikna ia ka jingpeitngor kaba pyrkhing.
U myntri rangbah ka jylla u la ban jur bunsien ba ka jingleit jingwan jong ki convoy kam dei ban pynjynjar ia ki paidbah.Ki jingbthah jong ka sorkar ki kren shai ba ym dei ban pynsangeh ia ki kali ba kyrkieh na ka bynta ka jingleit jingwan jong ki convoy na ka bynta ka jingmyntoi paidbah.
“Ngi shim khia bha ia kane ka kam, bad yn pynbeit ia ka jingkitkhlieh lyngba ka jingtohkit”, la ong ka hukum.
