Shillong, Risaw 01: Ki shijur kiba la jah rngai naduh ka 26 tarik u Nailur na iew Nongjri, South West Khasi Hills District, hynrei ha ka 29 tarik la lap noh ia ka met iap jong ki napoh ka shnong Nongjri.
Katkum ka kyrwoh khubor na u SP ka SWKHD Bah B Jyrwa u la pyntip ba ha ka 28 tarik u Nailur ki Pulit ka Mawsynram Police Station kila ioh pdiang ia ka ejahar shaphang ka jingjah jong ka kong Aijingsuk Kharbani bad u Kop Lapang kiba dei shi lok.
Katkum u SP kine ki shilok kila jah rngai ha ka 26 tarik u Nailur na iew Nongjri kumba ha ka por 3 baje noh phai sngi bad naduh katei ka sngi kim shym la wan phai iing satia.
Shuh shuh u SP u la pyntip ba ha kaba iadei bad kane ka jngjia, la pyntip sha u O/C jong ka Nonghyllam Police Station bad kila pynlong ia ka jingwad ha ka thain Nongjri hynrei kim shym la lap satia.
Dei ha ka 29 tarik u Nailur, kumba ha ka por 1 baje noh phai sngi la ioh jingtip na ki nong shong shnong ba ki don ar tylli ki met iap la lap napoh ka shnong Nongjri.
Hadien ba la wan poi kiba ha iing, ia ki met iap jong kine ki ar ngut la ithuh bad tip kyrteng kum u Kop Lapang 32 snem uba dei u khun jong u Bah Well Shylla ba shong basah ha ka shnong Um shaw, Ri Bhoi District bad ka Aijingsuk Kharbani 23 snem khun jong u Bah Drasing Wahlang na ka shnong Pungkung East Khasi Hills.
Namar ka met jong kine ki ar ngut kala sdang pyut, la leh noh ia ka post mortem ha katei hi ka jaka bad ha katei hi ka sngi la aiti noh ia ka met iap jong kitei ki ar ngut sha kiba ha iing.
Ki Pulit kila register case halor kane ka jingjia bad ka jingtohkit ka dang iaid shakhmat ban lap ia ka daw tynrai ka jingiap jong ki.
