Guwahati, Risaw 1: Ka sorkar Assam ka la pynmih ïa ki jingbthah kaba tyngeh sha baroh ki District Commissioner (DC) bad ki Senior Superintendent of Police (SSP) ban pynthikna ba ka jingïaid jong ka kynhun u Myntri Rangbah ka Jylla kam dei ban pynjynjar ïa ki paidbah ne pynslem ïa ki jingshakri ba kyrkieh.
Kine ki jingbthah ki long hadien ka jingjia ha Silchar ha kaba ka kali kit nongpang kaba kit ïa u nongpang ka la shah pynsangeh shipor ha ki pulit pynïaid kali ban ailad ïa ka kynhun jong u Myntri Rangbah ka jylla u Dr Himanta Biswa Sarma ban ïaid.
U myntri rangbah ka jylla u la pynpaw ia ka jingbym iahap kaba jur halor kane ka jingjia bad u la panmap na u nongpang bad ia ka iing ka sem. Hadien kata la sospon ia saw ngut ki pulit namar ka jingbym shimkhia ia ka kam ram.
Hadien kane ka jingjia, ka Ophis jong u Myntri Rangbah ka Jylla ka la pynmih ïa ka hukum kaba batai ïa ki kyndon ba dei ban bud na ka bynta ki jingïaid jong ki kali VIP.
Hapoh katei ka order, ki kali kit nongpang, ki kali pynlip ding bad ki kali ba ïarap jong ki pulit ki dei ban ïoh ïa ka jingïaid khlem jingkhanglad ha man la ka por, kynthup ha ka por ba ïaid jong ka kynhun jong u Myntri Rangbah ka Jylla.
La bthah ruh ia ki ophisar pyniaid kali ban pynthikna ba ki kali kiba leit (emergency) kyrkieh kim dei ban iakynduh jingeh.Lada donkam, dei ban pynsangeh noh ia ka kali jong u Myntri Rangbah ka Jylla khnang ban ailad ia ka kali kit nongpang ne kiwei kiwei ki kali ba kyrkieh ban iaid mardor.
Ka sorkar ka la bthah ia ki heh sorkar ban pynduna ia ka jingpynthut ia ka jingleit jingwan kaba man ka por ha ka por ba ki VIP ki iaid.Ki jingpynkylla lynti bad ki jingpynbeit lynti dei ban pyniaid ha ka rukom kaba kiar na ka jingeh kaba khlem da donkam ia ki nongleit nongwan.
Ka jingheh jong ka kynhun jong u Myntri Rangbah ka Jylla ruh la buh pud tang ha ka jingdon jong ki kali kiba donkam na ka bynta ki jingthmu ba kongsan jong ka jingpahara bad jingtreikam.
Ka order ka khang ruh ïa ki Myntri Myntri Rangbah, ki MLA bad kiwei kiwei ki riew pawkhmat kiba wan jngoh ïa kajuh ka jingïalang ban ïadon bynta ne ïaid ryngkat bad u Myntri Rangbah ka Jylla. Ki kali jong ki ki dei ban iaid la ka jong.
Ka sorkar ka la kren shai ba ki ophisar kiba don ka jingkitkhlieh ia ka jingpynbeit ia ki kali bad ki kali kin peit hi dalade ia ka jingbud ryntih.
Ia kino kino ka jingbym bud ryntih ia ki jingbthah ba la buh ne ka jingbym pyntreikam yn sa leh da kaba tyngeh, la ong ka sorkar.
