Shillong Nailar 25: Ka Hynniewtrep Youth Council (HYC) kala iawer ia u Myntri Rangbah ka jylla Conrad Kongkal Sangma lem bad ki Myntri Sorkar ne MLA ba kin wan iashimbynta haka jingiatai nia ban pynksan halor ka MoU iapynbeit ia u pud u sam hapdeng ka jylla Assam bad Meghalaya.
U General Secretary ka HYC u Bah RoykuparSynrem ula ong, hadien ba ka seng kala pynlong ia ka jingialang pyrshah MoU ha Nongstoin, West Khasi Hills, kila don ki kynhun saiñ hima bad ki nongbud kiba la kren ba ka HYC ka pyrshang ban ialam bakla iaki paidbah halor ka MoU ia pynbeit pud hapdeng ka Meghalaya & Assam.
“Ka HYC ka kren da kaba shai ba kam shym la ialam bakla ia ki paidbah lane kam shym la pynthud ia ka jingthmu ka Sorkar Meghalaya ban ia pynbeit ia u pud u sam bad ka Assam. Ka HYC kam don hok ban ialam bakla ia ki paidbah bad wat ki Myntri sorkar ne ki MLA ruh kim don hok ban pynksan jubor iaka bym dei. Kumta ba kan long kaba shai bad ka bym noh shiliang, ka HYC ka kloi ban iatai haba shit haba shai halor ka MoU pynbeit pud” ong u Bah Roykupar.
U la ong, ka HYC ka burom ia ki paidbah bad iaka sur jong u paidbah bad kan pynlong da ka jingiakop pynshai paidbah lane ka jingiatai nia paidbah (Public Debate) halor ka MoU iapynbeit pud hapdeng ka Meghalaya bad Assam.
“Ka Seng kan sa buh iaki nongkren ban kren pyrshah iaka MoU bad ngi kyntu ia u Chief Minister, ki Minister bad ia kito kiba soi ne kyrshan ia ka MoU ba kin wan ban pynshai lane pynksan ia ka MoU kaba ki la dep soi. Ngi kwah ban kren Shai ba ngim kwah ban iatai nia bad ki briew ki bym don bynta ha ka jingsoi ia ka MoU lane ki bym don bynta ha ka jingiakren pynbeit pud bad ka Assam. Kumta, ngin pdiang tang ia u Chief Minister lane ki Minister lane ki MLA ba kin wan mih khmat ban kyrshan ia ka MoU lada don” ong u nongialam ka HYC.
Ula pyntip ba ia ka Jingiatai nia kaba nyngkong halor ka MoU yn pynlong ha Patharkhmah, Ribhoi District ha ka 30.8.2022 ha ka por 12 baje mynsngi bad yn sa pynlong ruh ha Shillong, Rambrai, Riangdo bad kiwei kiwei ki jaka.
U Bah Roykupar ula ong, lada Jia ba u Myntri Rangbah ne ki Myntri Sorkar ne ki MLA kiba soi lane rai ban soi ia ka MoU kim wan ban iashimbynta, ka HYC kan iaid shakhmat ban pynlong la ka jong ka prokram ban pynshai paidbah bad ban pyrshah ia katei ka MoU.
