Nongpoh, Nailar 25: Ka party UDP kala nang ioh mynsiem ha Ri-Bhoi District hadien ba 3 ngut ki nongïalam ba pawkhmat kiba la ih bha haka politik ba kynthup ruh 2 ngut ki CEM barim ka KHADC mynta ka sngi kila leit ban pynïasoh ïalade bad kane ka seng riewlum ha shuwa ka elekshon 2023,
Kine ki 3 ngut ki riew pawkhmat ka Ri-Bhoi kiba la pynïasoh ïalade bad ka UDP ki kynthup ïa u Bah RR Makdoh, u Bah CB Syiem kiba dei ki CEM barim ka KHADC lem bad u Bah RB Shadap ba dei u nongkyrshan ba radbah jong u Bah Jason Mawlong MLA ka Umsning haka elekshon bala dep.
Ïa kitei ki 3 ngut ki riew rangbah la pdiang da u Bah Metbah Lyngdoh President ka UDP haka jingialang ba long hynne ka sngi ha Iewmawlong ha ka jingdonlang u Bah Donbok Khymdeit President ka UDP ha Ri-Bhoi, u Bah Pius Marweiñ MLA ka Ranikor, u Bah Balajied Ranee MDC ka Nongpoh, Bah HDR Lyngdoh myntri barim ka sorkar jylla, bad kiwei kiwei.
Haba kren ha ka jingialang, kine ki 3 ngut ki riew rangbah naduh u Bah RR Makdoh, CB Syiem bad u Bah RB Shadap kila pynpaw ba ka daw bala pynlong ïaki ban iehnoh ïaka party kaba ki kyrshan baroh shi katta ka dei namar ba kim hun bad mon ia ka rukom treikam jong ki nongialam.
“Ngi iohi ruh ba ka UDP ka don ia ka lawei ba don jingkyrmen ha ka Jylla bad ka dei ruh ka party riewlum kaba ai jingshakri ia u duk u suk bad ki kup shilliang sem shillliang” kila ong.
Kila pynaw ruh ba UDP ka la ioh mynta ia ka jingshaniah u paidbah bad la kyrmen skhem ba ha ka elekshon ban wan, kane ka party kan ioh ban ialam hi noh ia ka Sorkar haba kyrmen skhem ruh ba kan sei ia ki MLA na baroh 5 tylli ki Constituency jong ka Ri-Bhoi.
U Bah Metbah Lyngdoh u la pynpaw ka jingsngewkmen ban pdiang ïa kitei 3 ngut ki riew rangbah bad ki nongkyrshan jong ki kiba la wan ban pynïasoh ïalade bad ka party UDP naka bynta ban ai ka jingshakri bad ban wanrah ki jingkylla haka district bad ka jylla baroh kawei.
“Kam long kaba suk ban jam na kawei ka party sha kawei pat, ka jingwan pynïasoh jong phi ka don ka daw tynrai bad ka dei namar ba phi iohi jngai ïaka jinglong jingman haka jylla bad baka party UDP ka dei ka party riew lum kaba don jingkyrmen ha kane elekshon ban wan” ula ong.
U la kop ruh baka UDP ka don ia ka thong ban synshar hadien ka elekshon 2023 kumba ka don ruh ki kyrtong bad ki nongïalam kiba tbit ki ban ïalam ïaka party naka bynta ka jingkylla haka jylla baroh kawei.
