Shillong, Nailar 25: Ka Iingkashari Meghalaya High Court hynne ka sngi Palei kala tynjuh ia ka Sorkar Jylla halor ka jingbym lah ban ai jingkhein ia ka jingdon jong u dewiong ba la dep tih shuwa u 2016 bad ba dang ap ban lilam ha kylleng ki jaka jong ka Jylla.
Haba bishar ia ka PIL halor kane ka kam, ka Iingkashari Full Bench bala khlieh da u Chief Justice Sanjib Banerjee kala ong “Kaba ima, ka Jylla kam shym la lah ban ai jingkhein ia ka jingdon u dewiong bala dep tih hashuwa u snem 2016 bad ba dang ap ban lilam ha kylleng ki jaka”.
Ka Iingkashari ka ong baka interim report ba lai bala file da u Justice BP Katakey ha ka 9 tarik Nailar 2022, kala ong ha ka paragraph 3.5 ba ka jingdon u dewiong bala dep tih “u don kat kum ka jinglum jingkhein ka NGT” ha ki rud surok jong ki 24 tylli ki jaka, ha kaba 12 tylli ki dei kiba ha East Jaintia Hills, 2 tylli ha West Khasi Hills, 7 tylli ha South West Khasi Hills bad 3 tylli ha South Garo Hills.
U Advocate General ula pyntip, ha ka jingshisha, u dewiong ba la dep tih kham mynshwa u lah ban don ha ki jaka pyllang dewiong kaba long haduh 1500 tylli ne tam eiei.
Hynrei ka Iingkashari ka ong ba kam pher haduh katno tylli ki don ki jaka pyllang dewiong, ka Jylla ka hap ban ieng kat kum ka jingkhein bala ai ha u Justice Katakey bad kumba la buh jingthoh ha ka paragraph 3.5 jong ka interim report.
Ka Iingkashari kala ong ruh ba lehse ka don ka jingialehkai hapdeng ka Jylla bad ka Coal India Limited ha kaba ka Jylla ka khmih lynti ia ka CIL ban leit thew ia u dewiong katba ka CIL pat ka ong ba kala thaw ia ka Committee khlem da pyntip sha ka Iingkashari ba kumno kan leit ban thew ia u dewiong.
Haba pynpaw ba ka jingthew ia u dewiong ba don ha rud surok ka lah ban nym donkam ia ki kor ka juk mynta, ka Iingkashari kala bthah b aka Jylla la da ka jingiarap ka CIL ne em, ka dei ban pynthikna ba kan pynpaw iaka jingdon jong u dewiong ha man ki jaka kat kum bala kdew ha ka para 3.5 jong ka interim report. Dei ban pyndep ia kane ka jingleit thew hapoh ka shitaiew naduh mynta ka sngi”.
Ka Iingkashari kala bthah ruh ia ka Jylla ba kan buh ha ka jingmut jingpyrkhat ban bud ia ki kyndon haba shalan ia u dewiong bad ban pyllang ia u bad ban pynthikna ruh ba kan shim ia ki lad ki lynti kat kum ka ain ha ki depot hashuwa ba kan shalan ia une u mar.
“Shisien ba la dep ai jingkhein ia ka jingdon u dewiong ha kylleng ki jaka, u Justice Katakey u lah ban ai ia ki jingai jingmut ha ryngkat ka jingiasyllok bad ki Ophisar ka Jylla bad CIL ban lilam ia une u mar, haba bthah ruh ban bud ryntih ia ki kyndon ba iadei bad ka jingpynmih jakhlia bad kiwei kiwei, ka ban long kat kum ka por bala kdew ha kane ka hukum”kala ong.
Kat kum ka jingkhein bala ai ha ka interim report, u dewiong uba kurup naka jingtih hadien jong u snem 2016-2017 u don haduh 67,525 MT.
Namar kane, ka Iingkashari kala bthah ba ka long kaba donkam ia kum une u dewiong ban lilam noh mardor kat kaba lah khnang ba kan nym don shuh ka jingwan theh ia u dewiong ba dang tih thymmai halo rune u dewiong rim bad pynman pat kum u dewiong bala tih shuwa u 2016.
Ha kajuh ka por, u Justice Katakey ula file ia ka interim report kaba saw ha ka 23 tarik Nailar, 2022.
