Shillong, Nailar 25: Haduh 26 tylli ki karkhana coke ki khlem ioh jingbit ban treikam ha Jylla namar ka jingbym don ia ka Consent to Establishment (CTE) bad ka Consent to Operate (CTO).
Ia kane la pynpaw ha ka interim report ba lai jong u Justice BP Katakey ba la aiti sha ka Iingkashari Meghalaya High Court, kaba shong bishar ia ka PIL ba iadei bad kane ka kam hynne ka sngi palei.
Kane ka interim report kala buh jingthoh ba ka sorkar Jylla kala pyntip sha ka Committee ba ym don kawei ruh na kine ki 26 tylli ki karkhana coke kiba la treikam ha Jylla.
Ka Sorkar kala pyntip ruh ia ka Committee ba kam pat ai satia ia ka CTE bad CTO sha kine ki karkhana bad kine ki 26 tylli ki karkhana kim lah satia ban treikam khlem da ioh ia kine ki jingbit.
Ka paragraph 3.19 jong ka interim report ka ong “Lada ym don ia ka CTE ne CTO, ki 26 tylli ki karkhana coke kin ym lah satia ban treikam bad lada ki treikam, kan dei ka jingpynkhein ia ki kyndon jong ka ain iada mariang”.
Ki 26 ngut kiba la pynlong mamla ha ka mukotduma bad kiba kwah ban pyntreikam noh ia kine ki karkhana coke, kila pdiang ia kaei kaba la pynpaw ha ka interim report jong u Justice Katakey.
Hynrei kila ong ba ym don satia ha ki jingai jingmut jong u Justice Katakey lane kano kano ka hukum ba pynmih da kane ka Iingkashari ha ka mukutduma, kan kah lynti ia ki kynhun ba kan applai ia ka jingbit lane licence lane ki certificate ban seng bad pyntreikam ia ki karkhana coke kat kum ka ain.
Ha ka hukum, ka Iingkashari kala kren shai ba kane ka mukotduma kan nym kah lynti ia kino kino ki briew kiba kwah seng ia ki karkhana coke ba kin applai ia ki jingbit, licence ne certificate ban pyntreikam ia ki karkhana kat kum ki kyndon jong ka ain.
Ka Iingkashari kala mynjur ruh ia ka jingkyrpad jong kine ki 26 liang mamla ban weng noh ia ki na ka mukotduma kaba dang iaid mynta.
