Nongpoh, Nailar 25: Ka Synjuk ki Rangbah Shnong ka Ri Bhoi District ha ryngkat ka seng KSU, RBYF, FKJGP bad HNYF ki la thaw ia ka Joint Action Committee ban ieng pyrshah ia ka jingthmu jong ka Sorkar ban wanrah ia ka Casino ne ktem khalai hapoh ka District.
Ia kane ka JAC la thaw ha ka jingialang bala khot da ka SKRS hynne ka sngi palei ha Iingdorbar Pahamsyiem, kaba la wan iashumbynta da ki nongialam jong ki saw tylli ki Seng.
Kane ka jingialang kala jied a u Bah BB Makdoh, President ka SKRS kum u Chairman bad u Bah Ferdynald K Kharkamni u ba dei u President ka KSU kum u Secretary.
Haba kren bad ki Nongthoh Khubor, u Bah Ferdynald Kharkamni, u la pynpaw ba ka jingialang da kawei ka nongrim kala rai ban ieng pyrshah beit triang halor ka jingthmu jong ka sorkar jylla ban wanrah ia kane ka ktem ia khalai hapoh kane ka district.
“Ka Ri-Bhoi district ka dei ka district kaba la paw bha ha ka jylla ha kiba bun ki liang bad kumta ngim kwah ba tang na ka daw ka Casino kaban wanrah ia ki kam awria, kane ka district kan jah burom” ula ong.
“Lada ka sorkar jylla ka kwah ban wanrah ia ka roi ka par bad ban kyntiew ia ki paidbah ka la dei ban wanrah pynban da kino kino ki lad ban pynmih ia ka lad iohkam iohjam jong ki khun samla bad ruh la dei ban wanrah ia ka jaka pule puthi kaba biang kum ki Government College ban plie lad ia ki samla ban ioh ia ki jingnang jingstad khamtam ki longiing baduk ha ka jaka jong kane ka Casino” ula bynrap.
La pynpaw ruh, ba halor ka jingai No Objection Certificate da ki katto katne tylli ki shnong ban ailad ia ka jingplie ia kine ki Casino, na ka liang ka JAC kan sa wad bniah la ha kano ka nongrim la ai ia kane ka NOC.
U la pyntip ba shen, ka JAC kan sa leit ban ia kynduh ia Myntri Rangbah ka jylla Meghalaya ban aiti da ka dorkhas ban ieng pyrshah halor kane ka Casino.
