Shillong , Nailur16: U Myntri ka tnad pule puthi Rakkam A Sangma, u la kynthoh jur ia ka kynhun Hindu kaba ialap ban khang bam doh masi bad ban khein kmie ia kane ka mrad ha India kum ka kynhun ki ‘biej’ bad ai jingmut ba dei ban khein ia ki kum ki “kynhun lehnoh.”
Haba iakren bad ki nongthoh khubor ha ka sngi Ba-ar, u Rakkam u la ban jur ba kine ki briew ki dei kiba duna ha ka jingsngewthuh shaphang ka jingsynshar jong ka India, ka jingpher jong ka kolshor, bad ka hok kat kum ka riti synshar ban long laitluid ha ka niam.
“Dei ban niew ia kine ki briew kum ki lehnoh bad ki bym ibit ban shah khot ki Hindu,” kynthoh u Rakkam. U la kyntu ruh ia ki ba kin pule bad sngewthuh ia ka riti synshar ka ri India, namar ki kam ba ki leh ki pyni ia ka jingbym biang ban shah khein kum ki nong India ba shisha.
U Sangma u la pynpaw ba ka doh masi ka long ka jingbam ba sngewtynnad bha ban iabam ha Meghalaya, kynthup ïa u shiet, bad u la kynthoh ïa kino kino ki jingpyrshang ban pynïadei ïa ka jingbam doh masi bad ka jingbat niam. “Ym don mano mano ba don ka hok ban pynbor ia kaei kaba kiwei ki dei ban bam,” u la bynrap.
U Myntri u la kdew ruh ia ka jingiatai ha Parliament ha u snem 1987 ha kaba u Late P.A. U Sangma, MP barim jong ka Tura, u la iada ia ka hok ban bam katba mon ha India, da kaba ban jur ia ka jingdonkam ban burom ia ki rukom im bapher bapher jong ki nongshongshnong ka Ri.
Ka sorkar Meghalaya ka la mad ïa ka jingpynbor na baroh ki bynta jong ka imlang sahlang ban nym ai kano kano ka jingbit na ka bynta ka “Gau Dhwaj Yatra” ba la tyrwa da u Gau Pratishtha Andolan (GPA), ka jingïakhih kaba thmu ban khanglad ïa ka jingpynïap masi bad ban niew ia ka masi sha ka kyrdan “ ka kmie”.
Ia kane ka Yatra la buh ban pynlong ha ka 2 tarik u Risaw ha Nongbah Shillong.
