Phai lyndet ki bor Sorkar ha Ri-lum Khasi ia kane ka kam be-ain
Tura, Jylliew 28: Ki Pulit ka West Garo Hills, kila pynlong ia ka jingkhynra kaba jur ha ki jaka them jong ka District ban tehlakam ia ka jingkhlong syiap be-ain na ki Wah, kaba la ktah bad pynjot ia ki jingthaw ba ha ki wah.
Kane ka jingkhynra kala jia hynnin ka sngi nyngkong ha kiba bun ki jaka khlong syiap kiba don harud wah jong ka thain Chibinang marjan ka Phulbari bad ki Pulit kila ioh ban kurup haduh 10 tylli ki Generator pynmih bording bad ki Pump na ka jingkhynra ha shnong Bangalkata jong ka Chibinang.
Ha kane ka jingkhynra, ki Pulit kila lap ba ka jingkhlong shyiap ka dang iaid shaid shaid hynrei ki nongkhlong shyiap tang mar syn iohi ia ki Pulit, kila phet krad ialade bad ieh noh ia ki tiar ki tar shadien.
“Ka Kynhun Pulit jong ngi kala kurup noh ia kine ki tiar (generator bad ki pump) bad la aiti noh ia ki sha ka Tnad Forest. Ka jingkhynra kan dang iai bteng ban pynkut ia kane ka kam khaii ba be-ain” ong u SP ka West Garo Hills u VS Rathore.
U Shyiap ula kylla long u mar ba rem bha ha kiba bun ki jaka jong ka Ri-lum Garo bad ka dor ba mynta ha Tura kala kot haduh T. 7000 shi trok.
Lah ioh jingtip ba ka jingkhlong shyiap be-ain ha Ri-lum Khasi ruh ka dei kaba jur bha khamtam ha ki Wah jong ka East Khasi Hills bad ka Ri-Bhoi District.
Ha Ri-Bhoi District, kane ka jingkhlong shyiap kala jia ruh wat na ki Pung pyllang um jong ka MeECL ban pynmih bording, kiba dei jong ka Wah Umtrew.
