Shillong, Naitung 14 : Ka jaka shong ba la thaw shipor na kabynta ki paidbah nongwan peitkai ia ka lympung ialehkai Shillong Premier League ha madan Third Ground Polo ka la khyllem kynsan khram ha ka por ba ki nongkyrshan ki dang shongshit bha mar ia thep kol ka Mawlai ia ka Ryntih ha ka jingiakhun kaba shongshit bha ha kane ka janmiet sngi Palei.
Kadei ruh ka sien kaba nyngkong ba ha ka lympung ialehkai jong ka Shillong Premier League ban sakhi ba ki nongwan peitkai kin poi bun bun bha.
Tad haduh ba thoh ia kane ka khubor ym pat ioh jingtip satia ba kan don kano kano ka jingmynsaw jong ki nongpeit kai.
Ha ka jingiakhun kaba long ha kane ka sngi, ka Mawlai kaba lamkhmat naduh ba sdang jong ka jingialehkai ka la ioh ban thep haduh 5-0 kol, kaba dei ka jingthep kol kaba bun tam naduh ba sdang jong ka lympung.
Watla ka Ryntih ka la pyrshang tyngeh ban pynphai kol hynrei kam shym la iohlad satia tad haduh ban da kut syndon ka por ialehkai.
