Shillong, Jymmang 29: Ka kynhun ba 16 ngut na Meghalaya ba kynthup ïa 14 ngut ki Junior Boys bad ar ngut ki khynnah kynthei ki la leit sha Odisha ha ka sngi Thohdieng ban ïashim bynta ha ka lympung ïalehkai Junior Boys and Girls National Kickboxing Championship kaba la pynbeit ban long ha Khurda naduh ka 30 tarik Jymmang haduh ka 3 tarik Jylliew.
Ïa kane ka kynhun jong ka Meghalaya State Kickboxing Association (MSKA) la ïalam ïa ka da ka nongïalehkai kickboxer international ka kong Daniella I W Mylliemngap na Lumparing Lumdorbar kum ka coach.
Ia kane ka jingialehkai national championship la pynlong da ka Odisha State Kickboxing Association hapoh ka jingpeit jong ka WAKO India Kickboxing Federation kaba dei ka National Sports Federation kaba la ithuh na ka bynta ka jingialehkai kickboxing hapoh ka Ministry of Youth Affairs and Sports, Government of India.Katei ka synjuk ka don ka jingiasoh bad ka World Association of Kickboxing Organisations (WAKO), kaba don ka jaka treikam jong ki ha Italy.
Ka kynhun ïalehkai na Meghalaya kan ïakhun ha ki kyrdan bapher bapher ba kynthup ïa ka K1 Rules, Low Kick, Full Contact, Kick Light bad Light Contact ha ki kyrdan jingkhia bapher bapher.
Ki dkhot jong ka kynhun ki kynthup ïa u Benjamin Nongtraw, u Aedriel Gordon Ranee, u Aldrin Osmond Pariat, u Derick Dashankur Nongrum, u Arrisot Bitdor Mawlieh, u Darren Ervim Blah, u Saikuparlang Phanbuh, u Sumarlang Kharumnuid, u Enkupar Wahlang, u Misariio Nongthailang Mengsharangker, U Nangsharang Lyngsharangker Nongkynrih, Hamebuhnam Pathaw, Nathania Mylliem Umpling bad Wanlarihun Kharbuki.
Katkum ka association, ia kane ka championship yn pynlong katkum ki kyndon jong ka WAKO International Federation bad ki rukom treikam ba thikna ba la pynmih da ka Ministry of Youth Affairs and Sports.
Ki official jong ka MSKA ki la pynpaw ïa ki jingjop ba phylla jong ka jylla ha kane ka jingïalehkai, da kaba pynpaw ba naduh u bnai Nailar 2017, ki nongïalehkai kickboxer ka Meghalaya ki la ïoh ban khur haduh 312 tylli ki takma, ba kynthup ïa 101 tylli ki takma ksiar, 99 tylli ki takma rupa bad 112 tylli ki takma rnong ha ki kyrdan bapher bapher. Ka association ka la ïoh ruh ban khur haduh 67 tylli ki takma kiba long ha ka kyrdan pyrthei bad hynniew tylli ki takma na ka bynta ka North-Eastern Hill University (NEHU) ha ka All India Inter-University Games naduh u snem 2019.
Ha ka send-off tea party kaba la pynlong shwa ban mih noh ka kynhun, ki nongkyrshan ki la pynpaw ïa ka jingshaniah ba ka kynhun jong ka Meghalaya kan nang pynbun shuh shuh ïa ka jingïoh takma jong ka jylla ha ki jingïakob ïalehkai kickboxing ha ka ri baroh kawei.
