Shillong, Naitung 23: Kadei ka sien kaba ar na ka bynta ka Shillong Lajong ban jop ha ka lympung ialehkai jong ka Shillong Premier League 2022 naduh ba sdang ia ka hadien ba ka la lah ban pynliem noh ia ka Malki da 1-0 kol ha ka jingiakhun kaba mar ia biang bor bha kaba long ha madan Third Ground, Polo.
Ia katei ka kol jop jong ka kynhun la ioh ban thep da u Wadajied Ryngkhlem ha ka minit kaba 6 jong ka kylla miet ban pyntikna ba katei ka kynhun kan ioh ban khur ia ki lai point.
Shwa jong kane ka jingiakhun, ka Lajong ka la don ha ka kyrdan kaba hynriew katba ka Malki pat ka don ha ka kyrdan kaba hynirew. Kitei baroh ar tylli ki kynhun ki don mar saw point tangba ka Lajong ka ioh bantam ha ka jingiapher ka jingthep kol.
Ka jingioh jong u Ryngkhlem ban thep ia katei ka kol jo na bynta ka Shillong Lajong kadei ha ka por ba u Khrawkupar Tamu ka Malki u dang thmu ban pynkiar ia ka bol na phyllaw kol hynrei katei ka bol ka leit beit ha kjat u Ryngkhlem bad ma u ruh khlem bakla u la thep suk sha kol.
Kumba long mynta, ka Lajong ka dang ioh tang ar tylli ki jingjop hynrei ka dang jngai bha ka lynti iaid ban poi tang mar shiteng jong ka miej ia khein point.
Ha ka jingiakhun kaba bud kaban long ha ka sngi Nyngkong, ka Mawlai kaba don ha khlieh duh jong ka miej ia khein point kan hap ban aireng pyrshah ia ka Rangdajied Untied FC ha ka por 4baje janmiet.
