spot_img

Khlad ka samla Rosy Sangma na ka jingleh torti ki doktor :Ujor FIR ka CBI

Date:

Share post:

New Delhi, Nailar 06 :Ka Central Bureau of Investigation (CBI) ka la rejistar case halor ka jingleh torti pyrshah ia u managing director bad ia ka dentist jong kawei ka private hospital ha Gurugram halor ka jingkhlad noh jong ka Rosy Sangma, ka ba trei kum ka GoAir air-hostess na Nagaland.

Ia ka first information report (FIR) la rejistar ha ka sngi Balang ba la lah hadien ka jingtohkit ka ba la neh slem bha.Katei ka tnat tohkit ka la rejistar case hapoh ki kyndon Section 304-A (ka ba wanrah ia ka jingiap na ka jingleh torti) pyrshah ia u doktor Anuj Bishnoi, managing director jong ka Alfaa Health Care Hospital bad ia ka dentist hapoh ka hospital, ka doktor Anjali Ashk.

Na ka liang ka ministry of home affairs ka la hukum da ka jingtohkit CBI hadien ba ki ba bun ki riew pawkhmat na ka thain shatei lammihngi (northeast) jong ka ri ka ba kynthup ia ka Agatha Sangma (dkhot ka Lok Sabha), Mukul Sangma (CM barim) bad u Lat ka jylla Meghalaya u Satya Pal Malik ki la kyntu ia u Myntri kam pohiing ka sorkar pdeng u Amit Shah ba un hukum da ka jingtohkit ka ba bniah halor ka jingiap jong ka Rosy Sangma bad u ba shipara arkmie jong ka, u Samuel.

Na ka liang u Myntri Rangbah (CM) ka Meghalaya, u Conrad K Sangma ruh u la pynpaw ka jingsngewkhia ka ba jur halor kane ka jingjia.

Ka FIR ka ong; “Lyngba ka jingtohkit la shem ba ka Rosy Sangma ka la ngat ha ka jingshitom ha baroh ki artylli ki kti bad ka kjat kamon nalor ka jingmih snam ka ba jur na ka jaka leit shabar ha ka 23 tarik u Jylliew 2021.La wanlam ia ka da ki arngut ki shipara shynrang jong ka nalor u Samuel Sangma shapoh Alfaa Health Care Hospital, Sector-10, Basai Road, Gurgaon ha ka por kumba 6 baje mynstep jong ka 24 tarik Jylliew.
Ha ka jingtohkit ba la pynshong nongrim na ka jinglong jingman baroh la shem ba ka Rosy Sangma ka la khlad noh namar ka jingleh torti ha ka bynta jong u doktor Anuj Bisnoi bad ka doktor Anjali Ashk.

Nalor kata ka FIR ka CBI ka la ong ruh ba ka doktor Ashk ka la sumar ia ka Rosy na ka jingmih snam watla ka dei ka doktor sumar bniat bad ka bym don jingtip ha ka ba iadei bad kum kitei ki jait jingshitom.

Ha ka jingpynpaw, ka Ashk ka la kdew ba ka Rosy ka donkam ban ioh saw unit ka snam bad ban shim ruh ia ka jingai jingmut na ka tnat gynaecologist.Na ka liang ka CBI ka la kam ba ym shym la khot ia ki gynaecologist wat hadien hynriew kynta, kata wat hadien ba ym shym la lah ban set ia ka jingmih snam, bad kane ka dei ka daw bah ka ba la pynlong ia ka Rosy ba kan khlad noh.

Share post:

spot_img
spot_img

Popular

More like this
Related

Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP)...

Kurup ka Tnad Custom ia ka bniat hati ba khia 27 kilo

Shillong, Jymmang 30 : Ha ka jingkhynra pyrshah ia...

Kyndit ka KSU ba phah pyniasoh ka Sorkar ia ki College sha ka Williamson Sangma University

Shillong Jymmang 30: Ka Khasi Students Union kala pynpaw...

Plie ka DGP ia ka jingkhang ban sngap ia ki jingeh bad jingai jingmut ki paidbah

Shillong, Jymmang 30: Kum shi bynta ban tei iaka...
spot_img