Shah ujor ejahar ka JNC ba iakhih pyrshah Toll Plaza | Dawa pynlait khajna ia ki kali ML-04 bad ML-11

Shillong, Jymmang 07 : Ka Jaintia National Council (JNC) Western Zone kala shah pynngat kyndon ain ha ki bor pyniaid ka Ialong Toll Plaza hadien ka jingnang heh ka jingiakhih ban sangeh lum khajna ia ki kali ka thain, kaba la pynbor ia ki Pulit ban register ia ka ejahar ha Phramer Traffic Cell, West Jaintia Hills.

Ka FIR kala mih hadien ka jingiakhih ka JNC kaba khang ia ka Pasyih/Ialong Toll Plaza ha NH-6 ba kan lum khajna na ki kali kiba don u nombor ML-04 bad ML-11- u nombor ka RTO na ka bynta ka West Jaintia Hills bad East Jaintia Hills District. Ka Council kala iasaid ba kine ki kali ki dei jong ki trai shnong ka thain bad kim dei ban shah khrong khajna.

U President ka JNC Western Zone Hamehi Bamon ula iathuh ba ula shah khot hajir ha ki Pulit ha ka step sngi Palei. “Nga la ioh pdiang ia ka phone call hynne ka step na ka Phramer Traffic Cell, West Jaintia Hills, ba bthah ia nga ban wan mih hakhmat u Officer-in-Charge haba iadei bad ka ejahar” ong u bah Bamon.

Ha thanad, la pyntop ba u Deputy Commissioner ka West Jaintia Hills ula dep pynmih ia ka hukum ba 7 tarik Lber, 2026, ba pynlait ia ki kali ML-04 jong ki riew shimet na ki phra tylli ki shnong kiba don marjan ka Toll Plaza-ka Ialong, Pasyih, Phramer, Sabah Mutwang, Muthlong, Mookaswan, Nangbah bad Mihmyntdu.

“U Ophisar ula ai jingmut ia ka Council baka rukom leit khang marmet ia ka toll plaza ka long kaba beain bad hap ban pynsangeh noh mardor” ong u Bah Bamon.

Hynrei ua ong ba ka JNC kala kyntait ia ka hukum u DC bad niew ia ka kum ka jingibein bad jingpyniapait iapra.

“Kane ka hukum ka pyniapait iapra ia ki paidbah ka ri-lum Jaintia. Ngin nym pdiang ia kane ka jingpynbeit ba shiliang. Ka jingdawa jong ngi ka long kaba shai-baroh ki kali ba don u nombor ML-04 bad ML-11 ki dei ban lait na ka jingsiew khajna ha kane ka toll plaza” ong u Bah Bamon.

Ka Council ka ong ba kala pan ia ka jingialang ba kyrkieh bad u Deputy Commissioner ban dawa pyndam noh lane pynkylla ia ka hukum ba 17 tarik Lber khnang ban kynthup lang ia baroh ki kali ML-04 bad ML-11. Lada ym pyntreikam ia ka jingdawa, kala maham ban nang pynjur ia ka jingiakhih.

Haba buh jingkylli ia ka hok lum khajna ka toll, u Bah Bamon ula ong ba ka surok ka dei kaba wan hashuwa ka plaza bad hadien b aka wan, ym shym la don kano kano ka jingkylla-ka surok ka long hi kumjuh-ka rukom pyntrei bad ka dor jong ka khajna bala oh kam iahap satia.

Haba pynksan ia ka jingiakhih, u Bah Bamon ula ong “Phi lah ban kem ia nga lane set ia nga, hynrei ka jingdawa jong ki paidbah ka dei ban pyntreikam. Kane kam dei tang ia nga lane ia ka Council-kane ka dei ka sur jong ka Jaidbynriew jong ngi”.

Ka JNC Western Zone ka pyntip ba ka Executive Committee kan sa shong bad ki nongialam ka CEC ha ki sngi ban wan ban shim rai ia ka sienjam ka ban pynbud hadien.