MSL | Pynkut ka A’chik SCO Rongjeng da ka jingjop ia ka lympung

Shillong, Jymmang 07: Ka A’chik SCO Rongjeng ka la pynkut ia ka jinghiar iakhun ha ka lympung 5th Meghalaya State League da ka jingjop kaba long da 3-2 pyrshah ia ka Balmanduri FC, ha ka jingiakhun ka Group G ba la long ha Williamnagar mynta ka sngi.

Ka jingiakhun ka long ba ka Balmanduri ka la lah ba kan tam shakhmat da ki ar kol kiba la ioh ban thep ia ki da u Chichang M Momin ha ka minit kaba 27 bad kaba 33, pynban ki rang ialehkai  ASCOR, ki la ieng iakhun tyngeh tad haduh ba kin da ioh ba kin pynphai kylla da ki lai tylli ki kol ba la thep ia ki da u Sensial Sangma (54′), Klubarth M Sangma (78′) bad Keri G Momin (88′).

Ka khubor na ka jingiakhun jong ka Group E, ka Iatyllilang Lumsehkot CSC ka la lah ba kan pynliem da 3-0 ia ka Lamyrsiang SCC, ha ka jingiakhun kaba la long ha Wahiajer , kaba ha shwa jong kane ka jingiakhun, kine ki ar kynhun ki pyntikna ialade ban bat ia ka kyrdan kaba lai  bad kaba saw na kane ka group.

Haba phai sha ki jingiakhun ban long lashai pat ka sngi, ha ka Group E,  ka jingiakhun kan long hapdeng ka Lumphyrnai Sohphoh FC pyrshah ia ka Shillong Lajong FC ha Wahiajer, katba ka Lawbah SC kan aireng pyrshah ia ka Mishon SSCC ha ka jingiakhun ka Group F ban long ha Mairang.