Shillong, Jymmang 8: U President ka NPP Meghalaya bad u Symbud Myntri Rangbah ka Jylla u Bah Prestone Tynsong ha ka sngi Palei, ula ong ba ka elekshon shiteng samoi jong ka MP Lok Sabha na Shillong kan long kaba pher bha bad ka kyntu ia baroh ki nongtrei jong ka seng ba kin pynsngewthuh ia ki paitbah ban jied ia u Dr DRL Nonglait khnang ba kan pynkhlain ia ka jingiakhun ka Meghalaya ban pynrung noh ia ka Ktien Khasi bad Garo ha ka Eighth Schedule jong ka riti synshar ka ri.
U Bah Tynsong ula kren ia kane ka jingialang jong ka NPP ha kaba la pynbna paitbah ba u President ka KAS u Dr D.R.L Nonglait un long u kyrtong ka NPP ban iakhun ia ka elekshon shiteng samoi na Shillong Parliamentary Constituency.
“Ka elekshon kan long kaba pher bha. Haba ngi leit phai biang sha ka histori jong u snem 2024, ia kaba ngam ju mutdur. Ngi don ruh ia ka jingsngewkhia ba ki jaidbynriew riewlum ba kila jied ia u (L) Dr Ricky AJ Syngkon ban mihkhmat ia ka Shillong Constituency ha ka Lok Sabha hynrei u Blei ula shim noh ia u. Kadei ka jingjia kaba la pynwandur hi da u Blei” ong u Bah Tynsong.
Haba kren shaphang ka jingkhlad u MP, ula ong “Katei ka jingjia kadei kaba la pynwandur hi da u Blei Trai Kynrad. Lada ngi kum ki briew ngi pyrkhat halor katei, ngin ym ioh ia kano kano ka jingkheiñ ruh, hynrei nga ong, to ngin ia leit phai biang sha ki paitbah ka bri u Hynniewtrep kiba Tipbriew Tipblei. Ngi ngeit skhem ba ka jingjia ka long ban nang pynkhlain ia ka lynti ban tip ia u briew bad ban tip ia u Blei, ia ka jaidbynriew ka jong ngi hangne hapoh ka jylla”.
Ula kyntu ia ki nongtrei bad nongkitkam ka seng ba kidei ban leit ha man la ki iing. “To ngin ia shimlang ia ka jingkitkhlieh naduh kane ka khyllipmat ban leit sha la ki shnong ki thaw bad ban leit ha man la ki iing ki sem ban pynsngewthuh, ba kan ym don kano kano ka jingsngewthuh bakla, khnang ba kin jied ia u kyrtong na ka seng jong ngi” ula ong.
U Bah Tynsong ula ong, ba ki mat kiba kongsan kidei ki bym pat lah ban pynbeit.
“Ki dang bun ki mat kiba dang sahteng” ula ong “U Dr DRL Nonglait, u President ka Khasi Authors’ Society — Ngi lah pyndep tang ia ka bynta kaba nyngkong bad ka bynta ka baar kadei kaba dang sahteng namar ba ym pat pynrung ha ka riti synshar jong ka ri bad kata kadei ka ktien Khasi bad Garo”.
“Lada ngi lah ne lada ki paitbah ki jied ia u (Dr Nonglait), nga ngeit skhem kane kan long ka jingplied ia ka jingangnud jong ki paid Khasi bad Garo ba kitei ki ktien dei ban kynthup noh ha ka riti synshar ka ri India. Nga tharai kan dei ka kabu ksiar ban pynsngewthuh kham bha ia ki paitbah khnang ba kin pynthikna ia ka jingjop kaba donburom” ula ong.
U Bah Tynsong ula maham ia ka politik jong ka jingiapait iapra. “Kam dei na ka bynta ka kyrteng jong ka NPP, namar ba baroh ki bishni ia ka NPP. Kaei kaba ngi sheptieng kadei ka politik jong ka jingiapait iapra kaba lah ban rung. Nga sheptieng na ka bynta kane ka jylla kaba rit, lada don ia ka jingiapait, kaei kaban jia?”
Ula ong ia ki nongialam bad ki nongtrei jongka NPP, “To ngin ia trei shitom. Ngim donkam ban kynthoh iano iano ruh. Ngi ngin leit ban pynsngewthuh, namar lada ngi jop, kan ym dei ka jingjop jong ka NPP hynrei ka jingjop jong ka jylla Meghalaya hi baroh kawei. Kan pynsting ia ki kam na ka bynta u Conrad Sangma lada jia ba mih ki mat kiba ktah ia ka niam, ka riti ka dustur bad ia ka jingngeit”.
U Bah Prestone ula pynkynmaw ia ki jingtynjuh naduh u snem 2018.
“Naduh u 2018 hadien ba ngi lah shimti ban ialam ia ka sorkar, kila don bun ki mat. Ngam lah ban klet, bun ki mishoneri kiba kwah ban wan sha Meghalaya sha ki jingialang Centenary ne na ka bynta ka Mishon ka jongki, ki don ki por ba kim ioh ia ka Visa ban wan. Ki nongialam na ki Niam bapher bapher ki ju leit mareh sha ka jingkhang jong u Myntri Rangbah uba dei ruh u National President, ia kaba u hap ban leit tied ia ki jingkhang kiba don ha Delhi. Lada ngi lah ban pynthikna ia ka jingjop jong u Dr Nonglait, kan pynsuk shibun ia ka sorkar bad ia ka seng ban tied ia ki jingkhang ha Delhi bad ia ki tnad bapher bapher, namar kum ka jylla ngi donkam ia katei na ka por sha ka por” ula ong.
U Bah Tynsong ula kren ruh halor ka syynniang kaba la noh da u Dr Nonglait.
“Hadien ba ngi lah shimti ia ka sorkar ha u snem 2018, ngi lah thaw ia ka committee ban pule bad ban ai jingmut ha kaba iadei bad ka Education Policy. U Dr Nonglait udei uba don bynta ha katei. Ngi lah don ruh ia ka core committee kaba la khlieh da u Bah RG Lyngdoh — kaba mut ngim donkam ban kylli eiei than shuh” ula ong.
“Ngi ngim shim la mutdur ba u Dr Nonglait ban don ryngkat lang bad ngi kum ka seng ban shim ia ka jingkitkhlieh kaba khia bah na ka bynta ka bha ka miat. U briew uba sted ha ka trei ka ktah bad uba aiti lut, ka jingwandur jong ka pule puthi mynta kadei shi bynta jong ka jingshemphang jong une u riewrangbah, ia kaba ngi kum ka sorkar bad ka seng ngi sngew kumba ngi kitram” la ong u Bah Prestone.
U MLA khlem seng ne Independent na Rambrai ula wan ban iashimbynta lang ha kane ka jingialang ka NPP ym ban pyniasoh noh ialade bad ka NPP hynrei ban pyni ba u ai ka jingkyrshan ia u Dr DRL Nonglait kum u kyrtong ban iakhun ia ka elekshon MP shiteng samoi, la iathuh u nongialam ka NPP.
