Shillong, Jymmang 07: U Myntri Rangbah ka Jylla Conrad K Sangma hynne ka sngi Palei ula ong, ba ka kam ban khang khyrdep ia ki par dewiong ha Meghalaya ka dei ka kam kaba jynjar bha namar ka jingduna jong ki nongtrei bad tang hapoh East Jaintia Hills district ki don haduh 22,000 tylli ki par.
“Ngi dang leh ia katei, kumba ngi lah ong naduh kaba sdang ba ki don bun bah ki par, tang ha East Jaintia Hills hi ki don haduh 22,000 ki par. Kata ka dei kaba lah pynpaw ha ka kaiphod hi” ong u Conrad haba jubab halor ka jingkhang khyrdep noh ia ki par dewiong kiba la iehshrah.
Ula ong, ba ki bor pyniaid district kila lah ban leh tang khyndiat eh. “Kumta kat ki bor district bad ki nongtrei kaba ki don, shu ong ba lada ngi pynleit jingmut ha ki 5,000 ne 6,000 tylli ki jaka bad ha ka shisien leh, kin dang don sa kumba 15,000 tylli kaba ngin shem jingeh ia ngi ban leh” ula ong.
U Conrad Sangma ula pynpaw ba kila mad jingeh ruh ha kaba iadei bad ka jingpeitngor. “Haba ngi lah sdang ban kynriah na kitei ki 5,000 bad pyrshang ban leit sa sha kiwei pat ki 5,000 tylli, haba phai biang sha kiba nyngkong ki 5000 tylli ngi hap ban khmih bniah ioh ka sdang biang ka kam” ula ong.
“Kumta kam long kaba suk kumba shu iohsngew. Kaei kaba kongsan kadei ba ngi long kiba iengskhem, ngi lah trei shitom ha ka jingpyrshang ka jong ngi, ki bor district ki lah trei palat ia ka por. Ngi lah pynkynriah ia ka bor trei na katei ka district sha kiwei pat ki district ban iarap ia ki bad ban kyrshan ia ki halor katei bad ngi ngin bteng ban pynthikna ba baroh ki sienjam kidei ban shim na ka liang jong ka sorkar, kumta baroh ki ain bad ki kyndon ain bad ki hukum jong ka iingbishar dei ban bud ryntih” la ong u Myntri Rangbah.
