Guwahati, Jymmang 07: Ki pulit jong ka Guwahati ki la kem ia ka kynhun runar kaba don 10 ngut, kiba la kynnoh donkti ha ki kam runar kum ha ka kam tuh, lute na ki warehouse, bad kiba tuh ia ki kali ha bynta bapher bapher jong ka Assam.
Kitei kiba la shah kynnoh ki dei kiba la tip kyrteng kum u Bipul Ali, u Ramjan Ali, u Piro Ali, u Nasir Ali, u Asadur Ali, u Abdul Bachik, u Mohammad Ali, u Shamsul Ali, u Shahidur Ali bad u Moktul Hussain.
Ki pulit ki la ioh kurup ia ka pistol airgun, ki tiar ialeh kiba nep, ki tiar RRU ba la tuh na ki tower mobile, bad katto katne ki tiar ba la kynnoh ba la pyndonkam ha ka por ba leh ia ki kam runar.
Ki pulit ki la ioh ban kurup ruh ia ar tylli ki kali saw shaka kiba don ia u number “AS01-LC-6337” bad “AS01-FL-0739”, ryngkat bad ar tylli ki thuk thuk kiba don ia u number “AS15-AA-7378” bad “AS14-T-8879”.
Katkum ka tyllong khubor na ki pulit, la ong ba ia kine ki dkhot ka kynhun runar la ioh ban kem ha ka jingkhynra kaba la pynlong ha Khanapara bad ha Hotel Royal Inn. Ki nongtohkit ki suba jur ba katei ka kynhun ka la pynlong ia ki kam runar na katei ka hotel la slem bah.
Ki pulit ki la iathuh ba kine ki gang ki donkti ha ki kam runar kiba bun ha kylleng ka Guwahati bad kiwei kiwei ki bynta jong ka Assam, kynthup ia ka jinglute, ka jingtuh ia ki tiar ba kordor jong ki mobile tower, ka jinglute na ki warehouse bad ka jinghijack ia ki kali.
Ki pulit mynta ki dang pynlong ia ka jingtohkit ia baroh kiba shah kynnoh ban lap ia ki jingiadei bad ki kam runar kiba iadei bad katei ka kynhun runar.
Ia kane ka jingkhynra la ialam hapoh ka jingpeit jong u Kapil Pathak, OC ka Basistha Police Station.
