Guwahati, Nailar 06: Ka kynhun na ka tnat Directorate of Vigilance & Anti-Corruption, Assam ka la ioh kem markhmat ia u Guru Prasad Khataniar, u ba dei u Registrar ka Bhattadev University, Pathsala, Bajali, district katba u dang pdiang ia ka pisa bam sap.
Lah ban kdew ba tang ha une u bnai Nailar, ki heh ka tnat Vigilance & Anti-Corruption ki la ioh ia ka jingjop ha ka ban lapdien ia ki kam bam sap jong ki heh sorkar jylla.
Ha ka 3 tarik mynta u bnai, ka kynhun ba kyrpang na ka tnat Directorate of Vigilance & Anti-Corruption, Assam, ki la ioh kem markhmat ia u Forest Ranger u Debabrata Gogoi jong ka Lakshipur, Cachar District katba u dang pdiang ia ka pisa bam sap.
Lah ban kdew ba hadien ba u la iohi ia ki heh sorkar, une u Ranger u la phet krad na ka kamram jong u ha ryngkat bad ka pisa bam sap, hynrei u la shah kem noh tang hadien khyndiat minit hadien ka jingbeh thong ia u.
Kham hashwa na ka liang ka tnat pulit ka Assam ka la kyntu ia ki nongshong shnong ka jylla ba kin pyntip halor kino kino ki kam dawa pisa da ki nongtrei sorkar ha ka ba ki la ai ruh ia ki artylli ki nombor phone ha ka ba iadei bad kane ka bynta.
Ia kane la pynbna da u Special Director General of Police (DGP) Law and Order, u GP Singh hynnin ka sngi Thohdieng.Ki nongshong shnong ki la shah kyntu ban phone halor kino kino ki kam bamsap sha kine ki nombor : 0361-2462295 bad 1800-3453767.
