Silchar, Nailar 06 :Na ka liang ka sorkar jylla kam shym la don satia ia ka jingthmu ban pynduh noh ia ka rukom aijinghikai lyngba ka ktien la jong ba ju pyndonkam, hynrei namar ka jingdawa jong ka por, yn pyndonkam ruh ia ka ktien English tang ha ka ba hikai ia ka sobjek mathematics bad science, pynpaw u Myntri ka tnat pule puthi ka Assam, u Dr. Ranoj Pegu.
Haba pynpaw shai, u Pegu u ba la wan poi ha Silchar ban jurip halor ka jinglah jong ki khynnah skul ha ka ba iadei bad ki sobjek pule jong ki, u la ong ba katto katne ki briew khlem da bishar bniah lyngba ki polisi treikam jong ka sorkar ki la sdang ban pynpaw pyrshah da ka ba kynnoh halor ka jingthmu ban pynduh noh ia ka ktien la jong ha ba aijinghikai hapoh ki skul.
U Pegu u la ong; “Ka sorkar jylla ha ka 28 tarik u Naitung ba la dep ka la wan shakhmat ha ryngkat ka rai ka ban sah jingkynmaw ha ka histori, kata ban pyntreikam ia ki artylli ki ktien, kata ka ktien Assamese ka ba la don lypa bad ka ktien English ha ki katto katne ki sobjek hapoh ki skul sorkar.
Ki bor pyniaid skul ki don ia ka mon ka ba laitluid na ka bynta ban pyndonkam ia ka ktien English ha ka ba aijinghikai hapoh ki skul, kata khlem da pynduh pat ia ka ktien ka ba la don lypa.
Kumba san haduh shiphew tylli ki skul hapoh kawei kawei ka district yn ithuh na ka bynta ban pyntreikam ia kine ki artylli ki ktien ha ka ba aijinghikai hapoh ki skul bad ia ka ba yn sa nang kyntiew da kaba pynshong nongrim na ka jingmih lyngba kane ka sienjam ba la shim.
Nalor kata u la ong ruh ba na ka liang ka sorkar ka dang pyrkhat khia bha ha ka ba iadei bad ka jingpynbha pat ia ki skul ki ba la shah ktah jur na ka jingshlei um ka ba dang shen ha ka jylla. “Ia mynta hi ngin khmih haduh katno yn lah ban bteng ia kane ka jingpynbha pat ia ki skul ki ba la julor lyngba ka SDRF fund.Ia ka ba sah yn sa shimti da ka sorkar.
Une u Myntri ka tnat pule puthi hynnin ka sngi u la leit ban jurip bniah ha ka ba iadei bad ka jinglah jong ki khynnah skul hapoh ki skul ha Cachar district.U Pegu u la pynlong ka jingleit jurip ia ka skul Brajo Govindo, Salganga hapoh Udharbond bad ia ka Adharchand HS School ha Silchar.
