Nongpoh, Nailar 30 : Ki Pulit ka Ri-Bhoi District, ha ka sngi Saitjain, kila ioh ban kem ia u Pulit ka Assam uba thmu ban leh beijot ia i Khynnah rit myn ha ka 27 tarik Nailar ha kawei ka shnong kaba hap hapoh Block-II.
Une u Pulit Assam u kyrteng u LNK/121 Projen Langthasa jong ka 18th APBN, Lumding bad ka jingtohkit mynta kala iaid shakhmat.
Kat kum ka ejahar u Kpa ine I Khynnah bala mudui ha Nongpoh Police Station, la kynnoh ba une u Pulit Assam ula pynbiej ia ine i Khynnah bad ula pynlaw ruh ia ki jain hynrei ha kum katei ka por, la lap noh da ki briew kiba la pyllait ia ine I khynnah bad bat ia une u Pulit. Hynrei la ong ba une u Pulit Assam ula ioh ban phet krad.
Ki Pulit kila register case ia kane ka jingjia ha Nongpoh Women Police Station kat kum ka Case No. 45(08)2025 hapoh ka kyndon 3(a)/4/5(a)(iv)(m)/6/18 POCSO Act.
Ki Pulit ka Ri-Bhoi kila phah ia ka kynhun hynnin ka sngi sha Lumding, Assam bad la ioh ban kem ia une u Pulit ka Assam hynne ka sngi. Ia une u runar la wan kit noh sha Nongpoh hynne hi ka janmiet.
Ka jingtohkit mynta kala iaid shakhmat bad la pyntip ba shen yn sa pyndep noh ia ka chargesheet pyrshah ia une u briew.
U SP u pyntip ba ka Tnad kan sa pyndep noh shaid shaid khlem ka jingpynslem ia ki kam kiba iadei bad ka jingai song jing iarap kat kum ka ain ia ine I khynnah da ka Sorkar Jylla.
Ula ai khublei ruh ia ki Ophisar ka Sorkar Meghalaya bad kumjuh ruh jong ka Assam namar ka jingshimkhia ban iarap lem ha kane ka kam.
