Guwahati, Nailar 30: U Myntri Rangbah ka jylla Assam Himanta Biswa Sarma ha ka sngi Saitjain u la ong ba ka jylla man la ka sngi kala pynlong ia ka pushback operations ne ka jingpynphai biang ia ki nong Bangladesh kiba wan rung tuh katkum ka kyndon jong ka Immigrant Expulsion Act.
Haba kren sha ki lad pathai khubor ha Guwahati, u Sarma u la ong, “Ka jingphah leit phai biang kadei ha ki ar bynta, kawei kadei ia kito ki briew kiba sah hapoh ka jylla Assam hapoh ka Immigrant Expulsion Act—bad mynta ngi la ioh bor ban pynphai biang noh ia ki nongwei ne (foreigner) kiba la wan rung hadien jong u snem 1971. Da kaba pyndonkam ia ka bor, ngi pynphai biang noh ia ki briew kiba sah hapoh ka jylla Assam bad kumjuh ruh kito kiba wan rung mynta.”
Shuh shuh u Samra u la ban jur ba baroh kiba wan rung thymmai bad kumjuh ruh kito kiba la shong la sah hadien jong u snem 1971 kila shah peit khmat bha ne (targeted).
“Ka jingpyniaid shaphrang ia ka kam ban pynphai biang ka dang iaid sha khmat bad kane ka kan iai bteng bad nga la bun bha ia ka,” u la ong.
U Sarma u la pynpaw ba ka jingpyrshang jong ka sorkar jylla ka thmu ban ïada ïa ka jinglong tynrai jong ka Assam, katba ka dang pynthikna ïa ka jingpyntreikam kaba pyrkhing ïa ka aiñ pyrshah ïa ki nongwan buhai shnong be-aiñ.
Ha ka jingpynkhreh kaba dang ïaid shakhmat pyrshah ïa ki nongwan rung be-aiñ na Bangladesh, baroh ki don 33 ngut kiba wan rung thymmai na Bangladesh kiba la shah pynphai biang sha shiliang u pud u sam.
Kham hashwa, u Myntri Rangbah ka Assam Himanta Biswa Sarma u la pynbna ba ki don haduh 36 ngut ki nongwan rung tuh beain na Bangladesh kiba la shah leit pynphai biang na Sribhumi bad South Salmara districts ha ka 25 tarik mynta u bnai Nailar, da kaba pynbna ba kum kine ki nongbuhai shnong shnong beain “ki pynkylla ïa ka jingbun briew jong ngi bad pynkheiñ ïa ka hok jong ki trai ri trai muluk.”
