Umiam, Nailar 21 : Ka All Khasi Meghalaya Tourist Taxi Association, ha ka sngi Thohdieng, kala rai ban ieng ha ka nongrim kaba skhem ban khang noh ia ka jingwan rung ki kali tourist na Assam sha Meghalaya lada ki kali kamai ka Meghalaya ki dang shah khang ban rung sha Assam.
Ka All Khasi Meghalaya Tourist Taxi Association kala jam sha ka sngi ka ba-ar ban khang ia ki kali tourist ka Assam ba kin wan rung sha Meghalaya ha Jingkieng Umiam.
Ka Association kala ong ba lada ki seng jong ki kali tourist ka Assam ki dang pyneh triang ia karai ban khang ia ka jingrung ki kali ka Meghalaya sha Assam, ki nongniah kali na Meghalaya ruh kin iengskhem bad kin nym kynran dien satia.
Kila pynpaw ba ki kali na Assam ruh, ym dei ban shah ba kin rung sha Meghalaya bad dei ban pyrrkhing ba kin kyntiew passenger tang haduh ha Jorabat, kumjuh ruh, ki taxi na Meghalaya kin pynkut ia ka lynti kamai ha Jorabat.
Ka Association kala kyntait ruh ia ka jingkam jong ki nongniah kalikaAssam ba ki nongniah kali ka Meghalaya kin duh ia ka kamai jakpoh lada pynjari ia kum kane ka jingkhang kamai.
Kala ong ba kane ka jingkam ka dei ka bym don nongrim, haba pynpaw ba ki nongniah kali tourist ka Meghalaya kila kamai iala ka jakpoh lyngba ki kam ba ki trei bad ki lah ban kyrshan dalade ialade.
Ha kane ka jingiakhih, ki nongniah kali tourist ka Jylla kila pyrta slogan ruh pyrshah ia ki seng jong ki kali tourist ka Assam.
Kat kum ka khubor ba ioh, ki seng jong ki kali tourist na Assam, kila pynieng ia ka dara ba shipor ha Jorabat ban khang ia ki kali Meghalaya bad ki kali Assam ba kin tam ia ka Jorabat katba ka Sorkar Meghalaya kam pat khot iakren.
