Shillong, Nailar 21 : Artylli ki kali Sorkar kiba la pynieng ha ka jaka set kali ba shngain, kila shah thang ha ki runar ha ka miet sngi Palei nalor ka jingshah kawang petrol bomb ha ki lai tylli ki jaka kiba hap hapoh ka jingkhmih ka Nongstoin Police Station.
Kawei ka Mahindra Marshal Max ba don u nombor ML01-4130, kaba pynieng ha Ophis u BDO, Nongstoin, bad ka Maruti Gyrsy ML01-6963 ba pynieng ha IB, PWD, Nongstoin, kila shah thang aduh da ingkhong.
Kat kum ka khubor Pulit la iathuh ba kala don ruh ka jingkawang petrol bomb ia ka Ophis u SE, PWD ha Mawkhlam, Nongpyndeng hynrei donbok ba ka jingjulor ka long kaba rit. Ka skylight kala julor malu mala bad dei da ka jingmih kloi u chowkidar, la lah ban tehlakam ia ka ding shuwa ba kan pynjulor klai.
Ki iathuh ruh ba u Assistant Commissioner ka Mawshynrut Civil Sub-Division Dr L Pohshna, ula pyntip ba ka Ophis u SDO, Mawshynrut Civil Sub-Division kala shah kawang petrol bomb ha ki runar ha ka miet sngi Palei.
La pyntip ba ia kane ka jingjia la lap da u chowkidar ha ka step sngi Thohdieng bad ka jingjulor ka long tang ia ka jingkhang iit bad ki shuki.
Ki Pulit kila ioh pdiang ia ka ejahar halor kine ki jingjia bad ka jingtohkit mynta kala iaid shakhmat ban lapdien ia ki briew kiba donkti.
