Shillong 03: Ka Nongkseh SSCC ka iai buh ialade haka thong ban iaknieh ia ka nam lahduh ka lympung Shillong Premier League 2026 bad kane ka la wan da ka jinglah ba kan pynliem ia ka Laitkor SC da 3-1, ha ka jingiakhun ba ka long hynne ka nohphai sngi ha SSA Stadium, Polo.
U Hardy Cliff Nongbri (55’), Dawanchwa Challam (81’) bad u Shano Tariang (90’+5) ki long ki lai ngut ki rang ialehkai ka Nongkseh kiba la thep ia ki lai tylli ki kol, katba ia ka shi kol ka Laitkor SC la thep ia ka da u Shelbilkstar Kharshilot (87’).
Da kane ka jingjop, ka Nongkseh SSCC (16 point) kan kiew sha ka kyrdan kaba lai ka miej iakhein point bad ia ryngkat bad ka lahduh ka samoi ba la dep ka Langsning FC, tangba ka jingiapher hapdeng kine ar kynhun ka dei ha ka jingiathep kol (goal difference +12 to +10), bad ba ki sah ruh ba kin iakhun hapdeng para maki ha ka 10 tarik mynta u bnai Risaw, ka sngi ban pynkut noh ia kane ka lympung.
Katba na ka liang ka kynhun ialehkai ka Laitkor, ka iai neh ha ka kyrdan kaba 9 hadien ba ka la lah ba kan ioh khur 6 point bad sah satang kawei ka jingiakhun ban pyndep.
Haba phai pat sha ka jingiakhun, kampher wat lada kan dei ka namrem ba 6, pynban ka Laitkor ka la ialehkai bha, kaba pynlong ia ka Nongkseh ba kan shem jingeh bha ba kan wanphai suk bad ka jingjop napdeng ka madan iakhun.
Ka Nongkseh kaba sngewthuh bha ia ka dor jong kane ka jingiakhun, ka la kyntiew bha ia la ka rukom ialehkai bad ha kum kane ka sur ba ka la ioh ba kan pynkhih nyngkong ia ka jar hadien ba u Mebankhraw Wahlang u la lah ban kynthih kham halor ban head ia ka bol ia kaba la lah shwa ban kyrda ia ka, hynrei ka bol kan poi hajan u Hardy bad dain un khyrwit ban pynkhih ia ka jar.
Kane kan dei ka kol ba 6 ba u Hardy un ioh ban thep ha kane ka samoi ialehkai ka SPL bad kylla long u rang ialehkai ban thep bun tylli ki kol ha kane ka samoi ba mynta.
Hadien kane, satang kumba 10 minit ba sah jong ka por iakhun, ka Laitkor SC ka la shem ba kan shah tam pat da ar kol, kaba wan hapdeng ka jingiabakla ki rang ialehkai ki jong ka ban iaknieh ia ka bol, kaba la plie lad biang ia u Hardy ba un rah tok shakhmat bad ban pynbuh sha u Shano Tariang uba la shut jam bha ia ka bol kaba la poi pat sha u Dawanchwa, uba la pynpar bha jai ia ka bol sha ka jaka kaba biang ban pynkhih ia ka jar.
Pynban ka jingiakhun ka la lam shaba itynnad bha hadien ba ka Laitkor SC ka la ioh ia ka kabu ba kan thep ia ka shi kol ka jong ka, kaba la wan ha ka dur ka freekick ba la shut da u Shanborlang Nonglait uba la lah ban pynpoi ha kut (box ) ka Nongkseh bad u Shelbilkstar u la ioh ban pyndei pat ia ka ban pynkhih ia ka jar.
Namar ka jingiakhun ka long kaba iakhaid, kam lah ban khlem da pynrah mynsiem ia ki rang ba shong ben ka Nongkseh, namar ki sngewthuh ba lada ka Laitkor SC ka lah ban pyniakhaid ia kane ka jingiakhun, kan long kumba theh umpjah ia ka kynhun, hynrei ha madan pat, ki rang ialehkai ka Nongkseh ki la ieng iada bha ia la ka jong ka kut, bad u Shano Tariang u la ioh ban lam lynti ban thep ia ka kol kaba lai, ha ka por ba la pynjlan ia kane ka jingiakhun.
Marsien ioh thep ia kane ka kol, ki rang ialehkai ha madan bad ba shong ben ka Nongkseh kim lah ban khlem da lehkmen, namar ka jingjop, ka plie lad pat ia ki ba kin iai neh ialade ha katta ka thong ban iaknieh rah ia ka nam lahduh.
Ka jingialehkai ban wan jong kane ka lympung kan long tad haduh ka sngi Hatmajai (Tuesday) ka taiew kaban wan, ha kaba ka Nangkiew Irat ba don ha ka kyrdan ba 8, kan mih madan ban iakhun ia ka kynhun ba don ha ka kyrdan ba 6 ka MLP FT, kaba la buh ban long ha ka por 3 baje nohphai sngi.
Kumba ka long ka Nangkiew Irat (8 point) kam pat lah ban lait na uta u line saw (relegation zone), ha ka juh ka por ka don ia kawei pat ka thong ban iakhun ban ioh rung sha ka thup ka Top 6, kaban plie lad ia ka ban ioh aireng ha ka kyrdan iakhun jong ka SSA Super Cup ban sa wan.
