Shillong, Risaw 04 : Ka Iingkashari District & Session Judge ka West Khasi Hills, kala hukum ban set phatok haduh ba un da iap ia u briew uba pyniap ia kawei ka longkmie ba 79 snem bad ka nongtrei iing, kaba la jia ha u snem 2021 ha Nongstoin.
U Superintendent of Police ka West Khasi Hills u pyntip ba une u briew u kyrteng u Banphrangkupar Nongbri.
U iathuh ba ha ka 24 tarik Nailar 2021, ki Pulit kila ioh pdiang ia ka ejahar na u nongujor ha ka por 10:21 baje mynstep ba pyntip ba ka Kmie jong u, bala 79 snem ka rta, kala shah khang kut na shabar ha ka Iingsah ha Nongstoin.
Hadien ba kyndang ia ka jingkhang bad rung shapoh ing, la lap pynban ia ka metiap jong ka Kmie kaba la thiah lyngktar ha kamra khlieng tiar. Haba rung pat sha kawei ka kamra, la lap sa ia kawei par ka metiap jong ka nongtrei iing ba dang 25 snem karta,kaba la thiah lyngktar ha kamra thiah.
Kane ka jingjia kala pynsuba jur ba kine ki arngut kila shah pyniap haki riew runar.
Ki Pulit ka Nongstoin Police Station kila register case ia kane ka jingjia hapoh ka kyndon 302/34 IPC bad ia ka jingtohkit la bynshet ha ka WPSI DP.Nongbri. Ha ka jingtohkit, la lap bad lah pynithuh ia u Banphrang kupar Nongbri kum u nongleh bymman.
Hadien ba pyndep ia ka jingtohkit bad dep lum lut ia ki sakhi satar, ka Investigating Officer kala aiti ia ka chargesheet pyrshah ia une u nongleh bymman hapoh ka kyndon 302 IPC.
U iathuh ba ha ka 30 tarik Nailur, ka Iingkashari District & Session Judge haba bishar ia baroh ki sakhi satar, kala rai pynrem ia u Banphrangkupar bad hukum ban set phatok ia u haduh ba un da iap nalor ka kuna ba mar T.1 lak naka bynta kine ki lanot.
