Shillong, Risaw 03 : Ka Meghalaya kala kyrpad ia ka Sorkar Pdeng ban pynsted noh ha ka jingthaw ia ka Games Technical Conduct Committee (GTCC) na ka bynta ka 39th National Games 2027 bad ban ai shuh shuh ia ka song jingiarap pisa.
U Myntri kam ialehkai ka Jylla Bah Wailadmiki Shylla ula pynsngew ia kane ha ka jingialang bad u Myntri ka Sorkar Pdeng ba khmih ia ki kam ialehkai Dr Mansukh Mandaviya hapoh ka iingsah jong u ha New Delhi hynnin ka sngi Saitjain.
Ia u Bah Wailad la synran da u President ka Meghalaya State Olympic Association (MSOA) Bah John Kharshiing. Ka jingialang kala urlong ruh tang hadien ka jingleit jngoh u Bah Wailad ia ka rukom pyniaid ia ka 20th Asian Games ba long ha Aichi-Nagoya, Japan.
Haba kren ha ka jingialang, u Bah Wailad ula ong “Ngi la iakren ia bun ki jingpynkhreh kiba kongsan na ka bynta ka 39th National Games Meghalaya 2027, kynthup ka jingdonkam ia ka Indian Olympic Association (IOA) ba kan thaw ia ka GTCC khamkloi kat kaba lah. Kane kan iarap ia ngi ban tip ia ki jait jingialehkai bad ban plan kham bha”.
Halor ka jingbei tyngka, u Myntri ula iathuh ba u Myntri ka Sorkar Pdeng ula pdiang ia ka jingkyrpad ka Jylla.
“Ngi kyrpad ban ai shuh shuh ia ka song jingiarap pisa na ka Ministry. Ula bthah ia ngi ban phah shuh shuh ia ki kot ki sla bad kular ba un pynbeit ia ka jingialang bad ki Heh ka Ministry bad ki Nongmihkhmat ka IOA” ong u Bah Wailad.
Ka GTCC ka long kaba kongsan namar ka rai ia ka thup jong ki jingialehkai ki ban pynialehkai ha ka National Games, ka ban ailad ia ki Jylla ba pynlong ia ka lumping ba kin sdang ia ki jingtei ba donkam bad ka jingpynkhreh ia ki jaka sah bad kiwei kiwei ki jingdonkam jong ki nongialehkai.
