Shillong, Nailar 21 : Ka Khasi Students’ Union (KSU) kala pynkylla ia ka jingthmu iakhih bad rai ban iakynduh ia baroh 60 ngut ki MLA hashuwa ka Dorbar Synrai ka Iingdorbar Thaw Ain ban sdang la 24 tarik Nailar, ha ka jaka ban iaid paidbah bad pynlong ia ka jingiashong kyllain mungor ha Khyndailad.
Haba pyntip ia kane ha ka sngi Thohdieng, u President barim ka KSU Bah Lambokstar Marngar ula ong “Mynta ka sngi ngi la pynkylla noh ia ki sienjam jong ngi. Mynta kan long noh tang ka jingleit iakynduh ia ki 60 ngut ki MLA ban aiti ia ka dorkhas ba pynkynmaw ia ki ba kin kren ia ki ishu hapoh ka Iingdorbar Thaw Ain”.
Ula pyntip ba ka jingiashong kyllain mungor ha Khyndailad kan ym long shuh hadien ba ki bor district kila weng noh ia ka jingai jingbit.
“Naba ia ka jingbit la pynsangeh noh da u DC, ngin ym pynlong shuh ia ka jingiashong kyllain mungor ha Khyndailad” ong u Bah Lambok haba pynpaw pat ka jingiakhih kan dang iai bteng.
Ula ong “Ngin dang pynbteng ia ki jingiakhih jong ngi. Ngin sa iashong bad shimrai ia kiwei pat ki jait iakhih ban pynlong”.
Ki san tylli ki mat jingdawa ka KSU ki kynthup ia ka jingdawa pynshitom ia u Deputy Commissioner, Superintendent of Police, ki Heh Pulit bad ki nongtrei ka MSPCB namar ka jingkhang ia ki paidbah ban leit iashimbynta ha ka public hearing ka Shree Cement ha East Jaintia Hills ba long ha ka 31 tarik Naitung.
Kiwei pat ki mat dawa ki dei ka jingpyntreikam pura ia ka Meghalaya Residents Safety and Security Act, 2016 haduh ban da pyntreikam ia ka Inner Line Permit, pynieng ia ki facilitation centre ha baroh ki18 tylli ki entry point ha ri-lum Khasi bad Jaintia ryngkat ka jingpynshisha da ki Dorbar Shnong, pyntreikamm ia ka Migrant Workmen Act, 2020 bala pynkylla, pynkylla thymmai ia ka thungkam thungkam ha NEIGRIHMS kynthup ka ratio ba 80:20 ia ki nos kynthei-shynrang, bad ai bhah ia ki trai shnong, bad weng noh ia ki interview ha ka thungkam ia ki kam Grade B,C bad D nalor ban don ka SoP ha baroh ki Recruitment Board.
