Shillong, Nailar 21 : U Lamphang ka Iingdorbar Thaw Ain Thomas A Sangma ula iakynduh ia u Myntri ka Tribal Affairs ka Ri Jual Oram ha New Delhi ha ka sngi Thohdieng bad aiti ia ka detailed project report (DPR) na ka bynta ka phase-II jong ka Iingdorbar Thaw Ain ba thymmai ka Jylla ha New Shillong.
Ha kane ka jingiakynduh, u Lamphang ula kren ruh ia ki ishu ba iadei bad ka bhah ka Sorkar pdeng ba iadei bad ka scholarship ba sahteng na ka bynta ki khynnah pule riewlum ka Meghalaya bad kyrpad ia u Myntri Rangbah ban iarap lem ha kaban pynkloi ia ka jingpynlait pisa.
Ula kyrpad ruh ba ia ka pisa ba dang sah dei ban pynlait tang ha kawei ka instalment ha ka jaka jong bun instalment, haba pynpaw ba kane ka pynlait na ki jinglong artatien bad ka jingbym sngewhun hapdeng ki khynnah pule kiba ap ia ka jingiarap.
U Lamphang ula ban jur ia ka jingdonkam ban pynlait hapoh ka por kabiang ia ka pisa scholarship khnang ban pynthikna ba ki khynnah pule riewlum kin ym mad ia ki jingeh ha ka jingpule jong ki.
Ka jingialang kala iakren ruh ia ki kam ba iadei bad ki kam pynroi jong ka Meghalaya Legislative Assembly bad ka bha ka miat ki khynnah pule riewlum ka Jylla ha ka liang ka pule dangle.
