Shillong, Risaw 03: U Symbud Myntri Rangbah ka Jylla Bah Sniawbhalang Dhar ha ka sngi saitjaiñ u la ong ba ka long kaba sngewsih ban ïohi ïa ki poster ba pynjah burom ïa u Symbud Myntri Rangbah ka jylla u Bah Prestone Tynsong bad u SP jong ka East Khasi Hills u Bah Vivek Syiem ba ki wan paw ha kane ka nongbah hadien ka jingpynpaw pyrthei ka KSU.
Kitei ki poster kiba la pyndait ha Mawlai, Mawkhar, Motphran bad kiwei kiwei ki jaka ha ka sngi Thohdieng, la kynnoh ba u bah Tynsong bad u bah Syiem ki pyndonkam ia ki trok kum ki ATM.Katei ka dei hadien shi sngi ba ka KSU ka la pynmih ia ki video ba la kynnoh ba ki pyni ia ka jinglum pisa be-ain kaba T.200 haduh T.500 na ki nongniah trok ha Mawkhanu bad Thangshalai.
Haba kylli halor kane, u Dhar u la ong, “U SP u la kren shai bha.Kam long kaba bha ban iohi ia kine ki jait poster baroh jong ki VIP bapher bapher.”
U la kyntu ia ki briew ba kin shim da ka lynti jong ka ain lada don kano kano ka jingleh bakla.
“Ka paw shai ba ngi ju kyrpad ba lada don kano kano ka jingbakla hangno hangno, ki lah ban iaid lyngba ka lynti kaba dei da kaba ujor FIR.Kata ka dei ka rukom treikam,” la ong u Dhar.
“Ka long kaba sngewsih ia nga ban iohi ia kito ki jait jingkynnoh.Ngi dei ban burom iwei ia iwei pat,” u la bynrap.
U SP jong ka East Khasi Hills u la hukum ban tohkit bniah ia kane ka jingkynnoh dawa pisa bad la rai ban sospon ia ki constable kiba donkti.
