Shillong, Jymmang 03: U Superintendent of Police ka East Khasi Hills Rituraj Ravi, ula ong ba ki Pulit kin nym shongthait ban pynthikna ba baroh ki briew kiba donkti ha ka jingkawang petrol bomb ia ki Police Station bad ki Nongkynti ka Sorkar kin shah kem bad ioh ia ka jingtian bishar kaba hok.
“Ngi la treikam palat ia ka por bad ngin nym shongthait ha kaban pynthikna ba baroh kiba donkti kin shah kem bad ba ka jingsuk kan ieng rasong” ong u Ravi haba iakren bad ki nongthoh khubor.
“Ngi la kut jingmut bad angnud ba kum kine ki jingpyrshang jong kine ki riew bymman lane ki samla ba shah ialam bakla kin ym long kiba hok” ula bynrap.
Haduh 7 tylli ki case kawang petrol bomb kila jia hapoh ka Jylla tang ha kane ka shibnai bala leit noh.
Kine ki kynthup ia ka jingkawang petrol bomb ia ka Mawlai Police Station, ka kali ba synran ia u Heh ka NEEPCO, ka Iingsah u Symbud Myntri Rangbah ka Jylla Bah Sniawbhalang Dhar, artylli ki kali ha Jowai Police Reserve, artylli ki Police Station-ka Sadar bad Rynjah Police Station, ka Ophis ka MGCC, ka len CRPF bad ka kali jong ka Tnad Water Resources.
U SP u iathuh ba ki Pulit kila dep ban register ia ka ejahar halor kine ki jingjia bad ka jingtohkit mynta kala iaid shakhmat.
U SP ula ong ruh ba ka dang kloi palat ban pyniasnoh ia kine ki jingkawang petrol bomb bad kino kino ki kynhun haba jubab ia ki jingkylli la kine ki jingjia ki don jingiadei bad ka jingshah kem ki dkhot Sengbhalang.
“Baroh kine ki jingjia ki dang don hapoh ka jingtohkit. Ka dang kloi palat ban pyniasnoh bad kino kino ki kynhun. Ngam pat lah ban batai lut ia kiei kiei baroh hynrei nga kular ba baroh kiba donkti ha kine ki jingjia kin sa shah kem” ula ong.
