Shillong, Jymmang 07 : U Myntri ka Tnad Public Health Engineering Marcuise N marak ula ong ba ka jingpynthymmai ia ka dor ba T.772.96 klur na ka bynta ka New Shillong Township Water Supply Scheme (Phase-I) ka dei ka bym lah kiar hadien ka jingtyrwa ban buh ia ka jaka theh niut marjan ka jaka ba thmu shna dam ha Nonghali-kaba la pynbor ia ka jingpynkylla.
Ha ka kyrwoh ba batai shai ia ka jingkiew haduh 43.55% ka dor na kaba mang nyngkong T. 538.44 klur, u Marcuise ula ong ba ka jingpyntrei ia ka project kala nang iar shuh shuh.
Kine harum ki dei ki mat jingpynshai jong ka Tnad Public Health Engineering (PHE) halor kane ka skhim.
Nongrim: Ka New Shillong Urban Water Scheme (Phase-1) ka la ioh ia ka mang tyngka kaba 538.44 klur.
• La pynwandur ia ka skim ban pynioh umdih sha New Shillong Township, ka Mawkhanu Knowledge City bad 32 tylli ki shnong ba marjan.
• La pynwandur ban pynbiang 135 LPCD (Liters Per Capita Per Day) kaba lah ban pynbiang umdih ia ki nongshong shnong haduh u 2057.
Ka jingdonkam ban pynthymmai ia ka dor:
Ka jingpynkynriah ia ka Dam: Ka jaka dam um kaba la thmu nyngkong la pynkynriah kham shaneng wah hadien ba la ioh jingtip ba ka don ka jingpyrkhat ban buh ia ka jaka bret niut ha ki sawdong sawkun jong ka dam kaba la thmu shna thymmai ha shnong Nonghali.
Kane ka jingpynkynriah ka la kyntiew ia ka lynter jong ka dam na ka 70 m sha ka 165 m bad ka jingbuh ia ki khyrdop pyllait um na kawei sha ka laitylli. Kumta, la pynkylla lut ia ka rukom pynwandur ia ka dam.
Ka jingtih shuh ia ka khyndew na ka bynta ban pynskhem ia ka Jackwell:
Ka jingpynkynriah kham shaneng wah ia ka dam ka la pynlong ruh ban hap kynriah ia ka jack well ha kaba ka jaka ha sawdong ka jack well la donkam ban hap tih shuh, bad pynskhem ia ka khyndew, bad kiwei kiwei.
Ka bailutksan na ka bynta ki Dorbar Shnong:
Ha kaba nyngkong, kam shym la don ka jingdawa bai lutksan na ki nongshong shnong/Dorbar Shnong na ka bynta ban pyniaid ia ki raw water pumping pipelines ha baroh ki jaka shnong. Hynrei, ia mynta, ka don ka jingdawa ia ka bailutksan na ka bynta kane.
Ka jingdonkam la ka jong ka bording:
Kane ka jingdonkam kam shym la paw ha ka DPR kaba nyngkong bad ka jingpynbiang la ka jong ka lain bording ka long kaba donkam na ka bynta ka jingbit jingbiang jong ka dam. Hynrei ka jingdonkam ia kane ka bording yn dang bishar bniah biang.
Ka jingshna biang ia ka surok:
Kumba 1.5 km jong ka surok PWD kaba don la hap ban pynpra noh bad tih ban pyniaid ia ki pipe namar ka jingpynkylla ha ka jingpynbeit ia u Pumping Main ha shnong Jaroit bad Diengpasoh. Ym lah ban kiar ia kane namar ka jingkylla jong ka jaka shna ia ka dam.
Ka jingkynton ia ka jinglut:
Ka la kiew da 43.55% Ka jinglut baroh: la pynthymmai na ka 538.44 klur sha ka 772.96 klur. Ka jingiapher da 234.52 klur
Kine ki jingpynkylla ki la nang kynton ia ka jinglut na ka bynta ki jingshna ia ki jingtei, ki kor ki bor bad ka bording kynthup ia ka bailutksan na ka shim jaka kaba pynlong ia ka jingmang tyngka kaba nyngkong ban nym dap.
Ka jingpynthymmai ia ka jingmang pisa ka long kaba donkam ban:
– Pynthikna ia ka jingshngain ka mariang bad ki sawdong sawkun da kaba kiar na kaba iajan bad ki jaka pynkhuid niut
– Wanrah jingshngain ia ki jingtei bad ki jaka ba pyniaid ia ka um lyngba ki pipe sha ka dam bad ka jackwell
– Ban wanrah ka jingiatreilang bad ki nongshong shnong da kaba siew bailutksan
– Ban pynthikna ia ka bording kaba biang ia ki jingtei kiba kongsan na ka bynta ka jingsam umdih ka bym don jingthut
– Ban pynbha biang ia ki jingdon jingem ki paidbah kiba la shah ktah ha ka por ba pyniaid ia ki pipe.
