Shillong, Jymmang 7: Ka samoi ialehkai u snem 2026 jong ka Shillong Sports Association (SSA) kala sdang hynne ka sngi Palei ha madan SSA ha Shillong da ka jingplie paidbah u Myntri Rangbah Conrad K Sangma, uba la iashimbynta ha ka jingialang kum u kongsan.
Ha kane ka jingialang la wan ban iashimbynta ruh da u Myntri ka tnad Sports & Youth Affairs, Bah Wailadmiki Shylla, kum u Symbud Kongsan, u Myntri kam ialehkia barim bad Presdent ka SSA Bah Banteidor Lyngdoh, nalor ki nongkitkam jong ka Associaton, ki kynhun ialehkai ba iashimbynta, ki rang ialehkai bad ki riew ieid phutbol.
Ha kane ka jingialang, u Myntri Rangbah ula pynbna paidbah ruh ba la plie ia ka samoi ialehkai phutbol 2026 bad ula pynher ia ka lama ka SSA, kum ka dak ka jingpynsdang ia ka jingialehkai league ka samoi.
Haba kren sha ki rangialehkai, ki nongpyniaid, bad ki riew ieid phutbol, u CM ula ai khublei ia ka Meghalaya Football Association bad ia ka Shillong Sports Association namar ka jingiai pyrshang ba khlem sangeh jong ki ha kaban pynkhlain ia ka jingialehkai phutbol hapoh ka Jylla.
“Ka phutbol ka bat ia ka jaka ba kyrpang ha ka dohnud jong ki briew jong ngi, bad ki samla ka Meghalaya ki ju pyni ia ka jingieid bha ia kane ka jingialehkai. La bun bun snem, ngim shym la lah ban ai ia ka rynsan, ka jingkyrshan bad ka lad ba ka jingialehkai phutbol ka dei ban ioh. Nga kmen ba ha kine ki khyndiat snem, lyngba ka jingiapyrshang lang jong ka Sorkar, ki nongpyniaid ia ka sports bad ki kynhun ba don bynta, ngi la lah ban kiew shaphrang bha” ula ong.
Haba pynskhem ia ka thong ka Sorkar ban pynroi ia ki kam ialehkai, u Myntri Rangbah ula ong “Ka thong jong ngi ka long kaba shai-ngi kwah ia ka Meghalaya bad khamtam ka Shillong, ba kan long ka Nongbah jong ka jingialehkai phutbol (Football Capital) ka Ri India”.
Ula ong ba katba ka jingkynshew pisa ha ki jingtei ka long kaba donkam, hynrei dei ban buh jingmut mar katjuh ha kaba pynroi ia ka bor briew ha ki jingialehkai. “Ngi dei ban kynshew ha ki nongilehkai jong ngi, ha ki coach jong ngi, ha ki lympung ialehkai jong ngi bad ha ki league jong ngi. La ka long ha ki kyrdan ka sor, district lane wat ha ka kyrdan ki block, ngi hap ban thaw ia ki lad ki lynti ia ki khynnah shynrang bad kynthei jong ngi ba kin iakhun, nang kiew bad phohsniew ban mihkhmat ia ka Meghalaya ha ki kyrdan kiba halor eh”.
U Myntri Rangbah ula pynkynmaw ruh ia ka jingkyrshan ka Sorkar ia ka SSA ha kine ki snem bala leit. Ula pyntip ba ha ka por ba ka Association ka wan iakren bad u, la kyrshan T.28 lak da kaba mang na ka Chief Minister’s Special Grant, kaba la pynkiew hadien sha ka T.30 lak na ka bynta ka aiom ba dang shu dep. Haba pynbteng ia ka jingkyrshan mynta u snem, ula pynbna ia ka jingiarap ba T.32 lak na ka Chief Minister’s Special Grant na ka bynta ban lah pynlong ia ka samoi ialehkai phutbol u snem 2026 kaba jop.
Haba iasam ia ka khubor bad ki nongialehkai, u Myntri Rangbah ila ong “Ka jingjop bad jingrem ki dei shibynta jong ka jingialehkai, kumba ki dei shibynta jong ka jingim. Kaei kaba kham kongsan ka long kumno phi ialehkai ia ka jingialehkai, kaei kaba phi ioh jinghikai n aka, katno phi trei shitom, katno phi long discipline, bad kumno phi pdiang ia ka jingjop ne jingshah rem. Kane ka dei ka mynsiem ki nongialehkai”.
U General Secretary ka SSA Bah Dipshon L Nongbri ula ai khublei ia u Myntri Rangbah bad ka Sorkar Jylla namar ka jingkyrshan ba khlem sangeh ha kaban pynroi ia ka jingialehkai phutbol ha Jylla. Ula pynpaw b aka jingkyrshan bala ai ha ki aiom lehkai bala leh kala pynlah ia ka Association ban pynlong ia baroh san tylli ki jingialehkai division jong ka phutbol league kaba jop, kynthup ka jingialehkai phutbol ki kynthei bad ki lympung ialehkai ha ki shnong ki thaw.
Haba kren halor ka jingiarap jong ka song pisa ba ioh jingiarap, ula pyntip ba kumba 95% na kane ka pisa bala ioh na ka Sorkar lah pyndonkam kum ka song khusnam sha ki club ba iasoh kiba iashimbynta ha ki lympung ialehkai ka SSA.
Ha kane ka jingialang la ai sngewbha ruh ia ki jersey ka SSA bad ki mementos sha ki kynrem ki lyndan, ka jingpynithuh ia ki kynhun ialehkai ba iashimbynta bad ka jingiashondur lang bad ki rang ialehkai nalor ki nongpyniaid.
Ka jingialehkai sdang jong kane ka samoi ka dei kaba la long hapdeng ka Mawnianglah Youth Sports Association bad ka Sei La Sap FCC, kaba la pynbud hadien ka jingialang plie.
