Shillong, Iaiong 28 : Kawei ka phone call ba pan jingiarap ha ka CM-Connect Helpline 1971 jong ka Sorkar Meghalaya, kala lam sha ka jingioh pynlait ia uwei u khynnah na Meghalaya uba la sahkut bad kynnoh shah pyntrei jubor ha kawei ka restaurant ha Kashmir, kaba shimpor tang da ki kynta ban lei shimti ia une u Khynnah.
Ha ka 24 tarik Iaiong, ka jingioh ia ka phone call ba pan jingiarap ha u nombor 1971, uba dei u helpline number jong ka CM-Connect, kala pyntyllun sted ia ka kam ban leit pynlait ia une u khynnah lyngba ka jingiatreilang bad kiwei ki Jylla.
Kane ka phone call ka pyntip ba une u Khynnah na Meghalaya ula sahkut ha Kashmir bad shah pynbor ban trei ha kawei ka restaurant hapdeng ka jingshah lehbein. Kaba sngew shyrkhei ka long ba une u khynnah ula sdang ban pyrkhat wat ban pynmynsaw ialade.
“Haba iohi ia ka jinglong kyrkieh ka kam, ka CM Connect hapoh ka jingialam u Myntri Rangbah Conrad K Sangma, mar mar kala buddien ia kane ka case lyngba ki bor treikam bapher bapher bad pan ia ka jingiatreilang na ki borkhmih ha Jammu & Kashmir” ong ka kyrwoh ha ka sngi Nyngkong.
Ki Ophisar kila shimkhia ia kane ka kam baroh shimiet, ban pynthikna ia ka jingiakren ba khlem sangeh khnang ban pynthikna ia ka jingleit pynlait ba mardor ia une u Khynnah.
“Tang hapoh ki kynta, ka kynhun ba kynthup ia u Assistant Labour Commissioner bad ka Anti-Human Trafficking Unit ha Jammy & Kashmir kila lapdien ia une u Khynnah” ong ka kyrwoh haba pyntip “Ia une u Khynnah la ioh ban pynlait na kane ka restaurant bad la pynkynriah ia u sha ka Shelter Home jong ka Sorkar”.
La pyntip ruh ba ka Sorkar kala shimkhia ban leh eiei pyrshah ia u nongaikam.
“Ia ka ejahar lah dep ban register, ka jingtohkit ruh kala sdang bad la bthah ia une u nongaikam ba un siew khuid lut ia baroh ka bainong jong une u Khynnah” bynrap ka kyrwoh.
Ka Sorkar kala kdew ia kane ka jingjia kum ka sakhi ia ka jingtreikam jong kane ka rynsan (CM Connect).
“Kane ka jingjia ka pyni ia ka jingtreikam bha ka CM Connect kum ka rynsan ban iatreilang bad ki nongshongshnong. Naduh ba sdang pyntreikam ia ka ha u Rymphang 2024, kane ka rynsan kala pynsuk ia ka lad ai jingiarap ia palat 70,000 ngut bad kumba 20,000 kiba ioh ban iakren markhmat, bad ka jingsngewhun ia ka jingshakri ka kot haduh 95%” ong ka kyrwoh.
Ka Sorkar Jylla, hapoh ka jingialam jong u Myntri Rangbah Conrad K Sangma, kala ai jingithuh ia kane ka jingtreikam kaba kloi bad ka jingkyrshan bala ai, kaba long kongsan ha kaban pynthikna ia ka jingioh pynlait ia une u Khynnah.
Ka Secretariat kala iai ban ia ka jingthmu jong kane ka helpline numbor.
“Na ka bynta ki nongshongshnong, ka khubor ka long kaba shai : Ka jingiarap ka ap tang ia kawei ka phone call. Kam pher shano phi don, ka CM Connect kan pynthikna ba ka sur jong phi kan poi sha ki bor ba dei peit ha ka lynti kaba sted bad ba treikam bha”.
“Dial 1971-namar man uwei pa uwei u nongshongshnong u don ka hok ban pynpaw bad ban shah skhor, bad man ka phone call ka long kaba kongsan” bynrap ka kyrwoh.
