Shillong, Iaiong 27 : Ka Meghalaya kan pyndonkam noh ia ka ktien English, Khasi bad Garo kum ka Official Language hapoh ka Ordinance ba thymmai bad ka jingpyntreikam kan sdang naduh ka sngi ban sa pynmih jingpynbna da ka Sorkar Jylla.
Ka Sorkar kala pynmih ia ka Meghalaya Official Languages Ordinance, 2026” ha ka Gazette of Meghalaya, Extraordinary ha ka sngi Nyngkong.
Ka jingpynbna ka Tnad Law (B) ka ong ba u Lat ula pynbna ia ka Ordinance ha ka 27 tarik Iaiong, “haba pyntreikam ia ka bor bala pynkup da ka clause (1) jong kaarticle 213 jong ka Riti Synshar ka Ri India”.
Kane ka sienjam kala wan ha ka por ba ka Iingdorbar Thaw Ain kam pat shong dorbar satia.
“Naba, ka Iingdorbar Thaw Ain jong ka Jylla Meghalaya kam pat shong dorbar bad u Lat u sngewhun ba don ka jingdawa ki kam kaba pynlong ia u ban shimkhia mardor ban leh eiei halor kane” ong ka jingpynbna.
Ka Ordinance, kaban treikam ha baroh kawei ka Jylla Meghalaya, kan sdang ban treikam hata ka sngi kaba ka Sorkar ka buh, da ka jingpynbna ha ka Official Gazette.
Shisien bala treikam, “ka ktien Englieh, Khasi bad Garo kin long noh ki Official Language ki ban pyn donkam ha barh lane ha kano ka kam Sorkar jong ka Jylla Meghalaya” ong ka kyndon ba 3 jong ka Ordinance.
Hynrei,ka English kan dang bat iala ka jong ka jaka ha kiba bun ki bynta ba kongsan. “Tangba ka ktien English kan iai bteng ban pyndonkam ha baroh ki Iingkashari Civil bad Criminal ha ka Jylla” ong ka Ordinance. Ki kam thaw Ain ruh kin iai bteng kat kum ki ain bala don lypa. “Nalor kane, ka jingpyniaid ia ki kam hapoh ka Meghalaya Legislative Assembly ruh kan long kat kum ki kyndon jong ka Meghalaya State Legislature (Continuance of the English Language) Act, 1980.”
La ailad ia ka Sorkar ba kan shim rai halor ka jingpyndonkam ia ki ktien.
Ka Ordinance ka buh ruh ia ki kyndon ban pyndonkam ia ki ktien kat kum ki thain.
“Ka Sorkar ka lah ban buh ia ka jingpyndonkam ia ka ktien English bad Khasi ha ki Ophis hapoh ki District, Sub-Division bad ki Block ha ka Khasi bad Jaintia Hills Division bad ka jingpyndonkam ia ka ktien English bad Garo ha ki Ophis jong ki District, Sub-Division bad ki Block ha Garo Hills Division”. Ka ktien English kan dang iai long ka ktien pyniasoh hapdeng ki District.
Halor ka pule puthi, ka pynshai, “Ym don eiei ha kane ka Ordinance ka ban ktah ia ka hok jong kino kino ki kynhun ba pyndonkam iala ka ktien haba ai jinghikai ha ki jaka pule kumba la buh da ka Riti Synshar ka Ri”.
Kane ka Ordinance ba thymmai ka pynduh noh ia ka ain barim. Ia ka “The Meghalaya State Language Act, 2025 (Meghalaya Act No.10 of 2005) la pynduh noh” ong ka kyndon 7.
