Shillong, Iaiong 28: Ka Sorkar Jylla kala thung ia ka Enquiry Committee kaba don 4 ngut ki dkhot ban tohkit bniah halor ka jingkynnoh ba kala don ka jingkyntait ban pdiang ban ai jingsumar ia iwei i heprit iba la suba ba i don ia ka jingpang ‘Rabies’ hapoh ka Tura Civil Hospital ha ka taiew kaba la dep.
Ia katei ka hukum la pynmih da ka Directorate of Health Services (MI), hadien ba kala don ka jingmih ha ki lad pathai khubor kaba la pynpaw halor katei ka jingjia kaba la jia ha ka 25 tarik u Iaiong.
Katkum ka jingpynbna kaba la pynmih ia kane ka committee yn khlieh da u Dr. Sombari Boro u Joint Director of Health Services (Garo Hills Division) bad ki dkhot ki kynthup ia u Dr. Perosh Marak u Joint Director of Health Services (MCH&FW), Dr. Cruzie N. Sangma District Medical and Health Officer ka East Garo Hills bad Dr. Valerie Laloo ka State Surveillance Officer hapoh jongka Integrated Disease Surveillance Programme (IDSP).
La bthah ia ka committee ba kan pynlong ia ka jingtohkit kaba bniah bha ha kaba iadei bad katei ka jingjia halor ka jingkynnoh ba la kyntait ban pdiang ban ai jingsumar hapoh ka Tura Civil Hospital. Kan khmih bniah ruh la ka don kano kano ka jingdkoh, ka jingleh thurmur ne ka jingbym pyndep ia la ka kamram na ka liang jong ki nongtrei kiba donkti ha kaban ai jingsumar.
La bthah ia ki ophisar ba kidei ban aiti ia ka kaiphod hapoh jong ka 7 sngi.
“Baroh kiba donbynta, la bthah ba kidei ba kin ai ka jingiatreilang kaba pura ia ka committee,” la ong ha ka hukum.
Kane ka jingjia kala pynmih ia ka jingsngewkhia halor ka rukom long jong ka rukom treikam kiba dei ban ai ia ka jingsumar kaba mardor bad ka jingioh ia ka lad ban ioh jingsumar kaba kyrkieh ha ki jaka sumar jong ka sorkar, khamtam eh haba suba jur ia ka jingpang Rabies, kaba donkam kyrkieh ban ioh ia ka jingsumar.
