Tura, Naitung 03: Ki Pulit ka West Garo Hills hynnin ka sngi saitjain, kila ioh ban kem ia ka kynhun ki nongrahbor na ka thain Rajabala katba ki dang thmu ban rahbor ia uwei u briew uba dang wan phai na Selsella.
Kane ka kynhun ka don laingut ki Dkhot bad ia kine baroh lai ngut la ioh ban kem da ki Pulit hadien arsngi ba ki pyrshang ban rahbor ia u briew uba dang wan phai naka jingialang ba long hapoh ka Ophis jong ka Salsella Development Block. Kane ka jingjia kala jia ha ka 30 tarik Jylliew 2022 ha ka por 5.30 baje janmiet.
Ki Pulit kila ioh jingtip ia kane ka jingjia ha ka 1 tarik Naitung 2022 lyngba ka ejahar ba pyntip ba une u briew ula shah thombor ha ki arngut ki briew ba kyrteng u Nur Alom jong ka shnong Sakmal bad u Nazidur Islam jong ka Kandergaon, kiba hap hapoh ka Rajabala Police Outpost.
La pyntip ba kine ki runar kila thombor ia une u briew ha ka shnong Haldibari bad pyrshang ban patan ia u ha kawei ka kali ban rahbor syndon ia u. Hynrei une u briew ula iakhun bad ula ioh ban phet krad. Hynrei kine ki arngut ki runar kila khot lang ia uwei pat u paralok ban iabeh thong ia une u briew bad kila thombor biang ia u ha kawei ka jaka kaba don hapdeng ka Haldibari bad Babetpara.
Hynrei une u briew ula shu lait im da ka sait da ka jingwan poi jong ki briew kiba iaid lynti, kiba la leit ai jingiarap mar mar bad leit synran ia u haduh ba un da poi ha Iing.
Ki Pulit mar mar kila pynlong ia ka jingkhynra bad kila ioh ban kem ia baroh lai ngut ki Nongrahbor kiba la tip kyrteng da u Nur Alom ba 23 snem na Sakmal, u Moshaidul Sheik ba 22 snem na Bhalgaon bad u Nazidur Rehman ba 23 snem na New Bhaitbari.
Ia kine ki laingut ki nongrahbor la kit noh sha Iingkashari ban tianbishar bad ka jingtohkit mynta kala iaid shakhmat, ong u Superintenden of Police ka West Garo Hills u Vivekanad Singh Rathore.
