Shillong, Nailur 07 : U Vice President ka Ri CP Radhakrishnan ha ka sngi Nyngkong ula ong ba ka riti dustur ka Meghalaya bad ki bor shnong ki phalang ia ka jinglong bapher bapher ka ri India bad ka jing khlain ka synshar paidbah haba pynlait ia ki project ba shongdor palat T.1,042 klur jong ka Jylla.
U Vice President ula buh ia ki mawnongrim jong ki 5 tylli ki project ba shongdor T. 1,010.95 klur bad ple ruh ia ka Maternity and Children’s Hospital ha Nongstoin ha ka jingialang ba long ha Soso Tham Auditorium.
Ia ka jingialang pdiang sngewbha la pynlong da ka Sorkar Meghalaya.
Kine ki san tylli ki project ki dei –ka New Shillong Water Supply Scheme Phase II Part A ba shongdior T. 850.58 klur, artylli ki project hapoh ka NESIDS, ka kamra sumar AYUSH ba 30 jingthiah ha Shillong Civil Hospital bad ka sub station ba 132/33 KV ha Mawkhanu hapoh ka PM-DevINE.
U Vice President ula plier uh ia ka hospital ha Nongstoin kaba la tei ha ka jinglut ba T.31 klur hapoh ka NHM.
Haba khein kum ka sngi ba kongsan bha na ka bynta ka Meghalaya, u Vice President ula ong “Ngi la wanrah ia bun tylli ki skhim thymmai na ka bynta ka roi ka par ka Meghalaya. Palat ia ka T.1000 klur ki project la plie mynta ka sngi bad nga thikna ba kane ka kan wanrah ia ka jingkylla kaba khraw ha ka roi ka par ka Meghalaya ha ki snem ban wan”.
Haba ai khublei ia ka jylla hapdeng ka jingpdiang sngewbha ia u, ula kular ba un iai don ryngkat beit bad ki paidbah ka Meghalaya ha ka lynti iaid sha ka roi ka par.
U Radhakrishnan ula iaroh ia ka jingitynnad ka mariang ka Meghalaya, ka kolshor bad ka jingai pateng ha ka kmie, haba pynpaw ba ki jingtreikam ba shitrhem jong ki dorbar shnong ki pyni ia ka jingriewspah ka synshar paidbah ka ri India.
Haba ban jur ia ka jingkiew shaphrang ba kynthup lang ia baroh, ula ong “Na ka bynta ban kynjoh iaka thong jong ka Viksit Bharat hapoh u 2047, man ki Jylla, ban ki jaka sor, man ki shnong bad man ki nongshongshnong ki dei ban long ki viksit. Ia kano kano ka kam pynroi lah ban khot ka kam pynroi tang lada ka kynthup lang ia baroh. Ym dei ban don ki kynhun riewlum ki ban shah ieh shadien”.
Haba pyniasoh ia ki lad pyniasoh bad ka jingkiew shaphrang, ula ong “Ka Act East Policy u Myntri Rangbah Duh ka ithuh ia ki lad pynthikna kum ka G for Growth. Khlem ki lad pyniasoh kan nym don satia ka jingkiew shaphrang”.
Ula pyntip ba palat 46,000 km ki surok nongkyndong lah dep ban shna ha ka thain Shatei Lam Mihngi ha kine ki 10 snem bala leit noh hapohka PMGSY, ha ka jinglut ba kot palat ia ka T.47,000 klur, da kaba pynleit jingmut ban pyniasoh ia ki shnong ba kyndong eh bad ki jaka sor bad kumjuh ruh sha ki nongbah.
Haba kdew ia ki Jingkieng Jri bad ka rukom long ki jaka ka thain Sohra bad Mawsynram, ula ong ba ka Jylla Meghalaya kala hikai ia ka Rib a kumno kan ia im ryngkat ryngkat bad ka mariang, bad ba dep ban pynneh pynsah ia ka mariang, ia ka kolshor bad ka dustur haba beh ia ka roi ka par.
Ula ai khublei ia u Myntri Rangbah Conrad K Sangma bad ia ka kynhun jong u namar ka prokram ba ula shim kynthup ia ka Homestay programme, CM-Elevate bad Green Meghalaya.
U Myntri Rangbah ka Jylla Conrad K Sangma, ki Symbud Myntri Rangbah Bah Prestone Tynsong bad Bah Sniawbhalang Dhar, u Myntri Sorkar Bah Sanbor Shullai, u Chief Secretary Dr Shakil P Ahammad lem bad kiwei ki heh ki hain kila iadonlang ha kane ka jingialang.
