Shillong, Nailur 07 : U Vice President ka India CP Radhakrishnan ha ka sngi Nyngkong ula ong ba ka ‘Secularism’ ha India ka shong eh ha ka jingburom mar kylliang ia ka jingngeit niam bad ka rukom mane.
Haba kren ha ka jingialang pdiang sngewbha ia u ha Soso Tham Auditorium hadien ba dep buh maw nongrim ia ki 5 tylli ki project ba shongdor T.1,010.95 klur, u Vice President ula sdang ia ka jingkren da jingduwai.
“Nga duwai ia u Trai Jisu Khrist ban kyrkhu ia ngi baroh mynta ka sngi”ula ong.
Haba batai ia ka jingmut secularism, u Radhakrishnan ula ong “Ka secularism ka dei eh halor ka jing burom mar kylliang ia ka rukom mane Blei, burom mar kylliang ia ki jingngeit bad kyrdan. U Blei u don tang uwei, hynrei baroh ki don ia la ka hok ban mane kat kaba ki kwah. Ngi dei ban ia imlang, ngi dei ban ia burom mar kylliang ia ki jingngeit. Kane ka mut secularism”.
U Radhakrishnan ula ong ba kane ka dei ka jingwan iuhkjat ba nyngkong eh ha Meghalaya hadien ba u long kum u Vice President bad pynpaw ia ka jingkmen ban iadonlang bad ki paidbah ka Jylla kiba don ia ka mynsiem ba sbun bad ba sngewrit.
“Nga ai khublei ia ki paidbah bad ka Sorkar Meghalaya hapoh ka jingialam u Myntri Rangbah Conrad K Sangma” ula bynrap.
U Radhakrishnam ula kular ruh ia u Myntri Rangbah ba un ai ia ka jingkyrshan kaba pura na ka bynta ka roi ka par jongka Jylla.
Ka Meghalaya ka dei kaba iatip lut halor ka jingitynnad ka mariang, ka kolshor ba iaid pateng la pateng bad ka jingtreikam ki bor synshar nala tynrai, ong u Vice President haba bynrap ba kane ka dei ka dustur tynrai kaba riewspah kaba phalang ia ka jinglong bapher bapher ka ri India.
Ula iaroh ia ka jingkiew shaphrang ka Jylla ha ka koit ka khiah,ka pule dangle, ka jingpynkupbor ia ki kynthei lyngba ki SHG bad ong ba u Myntri Rangbah Duh ula buh ia ka thong jong ka Viksit Bharat hapoh u 2047.
